Banklarda 1 ildə 11 min dollardan artıq valyuta dəyişmək qadağandır?

Banklarda 11 min ABŞ dollarından artıq məbləğdə valyutanın dəyişdirilməsinin mümkün olmadığı ilə bağlı fikirlər səsləndirilir. Bu məsələ nə qədər realdır? 

Məsələ ilə bağlı yaranan qeyri-müəyyənliyi aydınlaşdırmaq məqsədilə Valyuta.az Azərbaycan Mərkəzi Bankına rəsmi sorğu ünvanlayıb.

Mərkəzi Bankdan verilən rəsmi cavabda bildirilir ki, fiziki şəxslərin banklarla apardıqları nağd valyuta mübadiləsi əməliyyatlarının həcminə dair hüquqi məhdudiyyət nəzərdə tutulmayıb.

Fiziki şəxslərin banklar vasitəsilə valyuta dəyişmə əməliyyatları Mərkəzi Bankın təsdiqlədiyi “Yerli bankların şöbələrinin fəaliyyəti ilə bağlı şərtlər və tələblər, habelə banklar, onların filial və şöbələri tərəfindən nağd qaydada valyuta mübadiləsi əməliyyatlarının aparılması Qaydası” ilə tənzimlənir. Valyuta mübadiləsi fəaliyyətinə lisenziya almış şəxslər üçün isə ayrıca normativ sənədlər mövcuddur.

Qurumun izahatına əsasən, həm banklar, həm də valyuta mübadiləsi fəaliyyətinə lisenziya almış şəxslər cinayət yolu ilə əldə edilmiş əmlakın leqallaşdırılması və terrorçuluğun maliyyələşdirilməsinə qarşı daxili nəzarət proqramlarına malik olmalı, qanunvericiliklə müəyyən olunmuş minimum tələblərə riayət etməlidirlər.

Mövcud qaydalara görə, son bir il ərzində 20 000 manat və ya ona ekvivalent məbləğdən artıq valyuta əməliyyatı aparan fiziki şəxslərlə bağlı gücləndirilmiş müştəri uyğunluğu tədbirləri tətbiq olunmalıdır. Həmçinin, valyuta mübadiləsi fəaliyyəti ilə məşğul olan şəxslər tərəfindən bir müştəri ilə aparılan gündəlik əməliyyatın həcmi 20 000 manatı keçməməlidir.

Bu tələblər hüquqi qadağa deyil, maliyyə monitorinqi və risklərin idarə olunması məqsədilə tətbiq edilən nəzarət mexanizmləridir.

Valyuta.az-ın əlaqə saxladığı bir sıra banklar tərəfindən təqdim edilən məlumata əsasən, valyuta mübadiləsi zamanı əməliyyatın məbləği bəzi hallarda 11 000, bəzi hallarda isə 11 500 ABŞ dollarını keçdikdə, müştəridən vəsaitin mənbəyini təsdiq edən sənədin təqdim edilməsi tələb olunur. Ümumilikdə, bu tələblər valyuta dəyişmə əməliyyatının 11 000 ABŞ dollarından artıq olduğu hallarda tətbiq edilir.