"MicroStrategy" şirkətinin idarə heyətinin sədri və "Bitcoin"nin ən görkəmli tərəfdarlarından biri olan Maykl Saylor (Michael Saylor) cəsarətli bir proqnoz verib: qarşıdakı onilliklər ərzində "Bitcoin"ə böyük bir qlobal sərmayə axını olacaq.

Valyuta.Az xəbər verir ki, Saylora görə, bu dəyişiklik investorların daşınmaz əmlak, təbii resurslar və fiat valyutaları kimi ənənəvi aktivləri sataraq "BTC"yə sərmayə qoymasını təmin edəcək. Onun proqnozuna əsasən, "BTC"nin bazar dəyəri 2045-ci ilə qədər 280 trilyon dollara çata bilər.

Üç əsas amil

Saylor yaxınlarda etdiyi bir təqdimatda "BTC"nin dəyərinin sürətlə artacağı bir gələcəkdən danışıb və bu tendensiyanı üç əsas amillə əlaqələndirib:

1. İnnovasiya və texnologiya

Texnoloji inkişaflar sayəsində qlobal zənginlik artdıqca, "BTC"nin rəqəmsal bir dəyər saxlama vasitəsi kimi rolu möhkəmlənəcək.

2. İnflyasiya

Artan inflyasiya, investorları dizaynına görə deflyasiyalı olan "BTC" kimi aktivlərə yönəldə bilər.

3. Sərmayə axını

Saylor proqnozlaşdırır ki, investorlar sərmayələrini Mərkəzi Afrika daşınmaz əmlakı, Sibir təbii qazı və Argentina valyutası kimi daha az səmərəli və ya qeyri-sabit aktivlərdən "BTC"yə keçirəcəklər.

Bu dəyişikliyin qlobal xarakterinə diqqət çəkən Saylor bildirib: “İnsanlar "BTC" almaq üçün daşınmaz əmlaklarını, təbii qazlarını və hətta yerli valyutalarını satmağı düşünürlər.”

"BTC"nin qiyməti 13 milyon dollar ola bilər

Saylor hesab edir ki, "BTC" qlobal dominant pul aktivinə çevrildikcə, ənənəvi aktivlər – səhmlər, qızıl və daşınmaz əmlakdan daha sürətli böyüyəcək. O, bir "BTC"nin qiymətinin 2045-ci ilə qədər 13 milyon dollara çata biləcəyini təxmin edir.

Bu proqnoz qarşıdakı 21 il ərzində illik ortalama 29%-lik bir böyümə nisbətinə əsaslanır. Saylor "BTC"nin unikal xüsusiyyətlərinin onu digər aktiv siniflərindən üstün tutduğunu və daha çox dəyər qazandıracağını düşünür.

Bir "BTC"nin 13 milyon dollara çatması ilə bağlı sual verildikdə, Saylor belə cavab verib:
“İllik 29%-lik böyümə nisbətini nəzərə alsaq, 2045-ci ildə hər bir coin 13 milyon dollara çatır.”

Rəhim