Mark Zukerberq (Mark Zuckerberg) "Meta" səhmlərinin bu il rekord səviyyəyə çatmasından faydalanaraq böyük miqyaslı satış həyata keçirib.  

Valyuta.Az xəbər ki, "Meta"nın ("META") təsisçisi və baş icraçı direktoru Zukerberq, "Fortune" tərəfindən aparılan təhlilə əsasən, son bir il ərzində "Meta" səhmlərindən 2,2 milyard dollardan çox gəlir əldə edib. Cari ilin yalnız dekabr ayında isə o, 153,2 milyon dollarlıq səhmlər satıb. Bu satışlar və onların dəyəri rəhbər şəxslər haqqında məlumat təmin edən "Equilar" tərəfindən təsdiqlənib.  

"Meta"nın səhmləri bu il 82% artaraq 630 dollara çatıb və şirkət 1 trilyon dollardan çox bazar dəyərinə nail olub. Beləliklə, "Meta", "Apple" və "Amazon" kimi texnologiya nəhəngləri arasında öz mövqeyini daha da gücləndirib.  

Zukerberq və həyat yoldaşı Prissilla Çan (Priscilla Chan) var-dövlətlərinin əksəriyyətini həyatda olarkən bağışlamaq niyyətində olduqlarını bəyan ediblər. Bu prosesin böyük hissəsi onların yaratdığı "Çan-Zukerberq Təşəbbüsü" vasitəsilə həyata keçirilir. Təşkilat əsasən elm və tədqiqatlara yönəlmiş qrantlar və sərmayələr təklif edir və ənənəvi xeyriyyəçilik modellərindən fərqli olaraq "filantrokapitalizm" yanaşmasını tətbiq edir.  

Keçən il Zukerberq "Meta" səhmlərindən 400 milyon dollardan çox gəlir əldə etmişdi. Ondan əvvəlki iki il ərzində isə şirkətin səhmlərinin dəyərinin azalması fonunda heç bir satış həyata keçirilməmişdi. Həmin dövrdə "Meta" əsas diqqətini artırılmış və virtual reallıq texnologiyaları ilə bağlı "metakainat" konsepsiyasına yönəltmişdi. Lakin həmin dövrdə həm "Facebook" istifadəçilərinin sayı ilk dəfə azalmış, həm də reklam gəlirləri aşağı düşmüşdü.  

Bu azalmanın əsas səbəblərindən biri "Apple" cihazlarında tətbiq izləmə funksiyasından imtina etmək imkanı idi ki, bu da "Meta"nın rəqəmsal reklam satışlarına ciddi təsir göstərmişdi.  

2024-cü ildə Zukerberq təxminən 4,6 milyon "Meta" səhmi sataraq keçən ilkindən dörd dəfə çox səhmi satışa çıxarıb və bununla beş dəfə artıq gəlir əldə edib. Bu il "Meta" diqqətini yaradıcı süni intellekt texnologiyalarına və daha praktik cihazlara, məsələn, "Meta Ray-Bans" eynəklərinə yönəldib. Şirkətin reklam biznesi isə hər rübdə yenidən böyüməyə başlayıb. Hazırda Zukerberqin sərvəti "Bloomberg" təxminlərinə əsasən, 223 milyard dollardır.  

"Meta" sözçüsü bu məsələ ilə bağlı şərh verməkdən imtina edib.  

Bununla yanaşı, Donald Tramp "Meta" və Zukerberqə qarşı sərt tənqidi mövqedədir. O, əvvəllər Zukerberqin xeyriyyə yardımlarını "Zukerbak" adlandıraraq onu həbsə göndərməklə hədələmişdi. Bununla belə, Trampın dəstəyini qazanmağa çalışan Zukerberq son zamanlarda onunla Floridadakı evində şam yeməyinə qatılıb. Həmçinin, "Wall Street Journal"ın məlumatına görə, "Meta" Trampın inauqurasiya fondu üçün 1 milyon dollar bağış edib.  

Bu ilin yayında Zukerberq Konqresə yazdığı məktubda siyasi baxımdan "neytral" olmağa çalışdığını və seçkilərdə iştirak etməmək niyyətində olduğunu bildirmişdi. Lakin seçkilərdən sonra onun bu mövqeyini dəyişdirdiyi görünür. "Ağ Ev"lə əlaqələrin gücləndirilməsi "Meta" səhmlərinin gələcəkdə daha da yüksəlməsinə kömək edə bilər.  

Qeyd edək ki, Trampın prezident seçilməsindən bu yana "Meta"nın səhmlərində 10%-lik qiymət artımı qeydə alınıb.

Rəhim