Yeni iş yeri axtararkən hansı imtiyazlar tələb edilməlidir?

Bugünkü əmək bazarında yeni iş axtaranlar yalnız iş tapmaq üçün yarışan tərəf deyil — onlar öz şərtlərini müəyyənləşdirmə gücünə sahib olan aktiv namizədlərdir. Şirkətlər bacarıqlı, motivasiyalı və yenilikçi kadrları cəlb etmək üçün daha yaxşı imkanlar yaratmağa məcburdur.

Bəs yeni iş yeri axtararkən hansı imtiyazlar tələb edilməlidir?

İnsan resursları üzrə mütəxəsis İlkin Mirzəzadə Valyuta.az-a bildirir ki, bu mövzu şəxsə görə dəyişir: "Məsələn, karyerasının başlanğıcında olan, yeni universiteti bitirmiş, iş həyatına yeni qədəm qoyan şəxslər adətən az imtiyaz tələb edirlər və ya heç tələb etmirlər. Onlar, əsasən, təcrübə toplamaq məqsədilə müəyyən müddət çətin işlərə belə razı olurlar. Lakin yaş artdıqca və həyat səviyyəsi yüksəldikcə, tələb olunan imtiyazlar da artır. Bəzi şirkətlər bu tələbləri istənilən əməkdaşına təqdim etməyə çalışır. Məsələn, işçilərin idmana yönləndirilməsi, rifahlarının təmin edilməsi, sağlamlıq proqramları, təlim və təcrübə proqramları, səyahət və xaricdə təcrübə mübadiləsi kimi imkanlar təqdim olunur".

"Təbii ki, bu imkanlar şirkətin ölçüsünə və büdcəsinə görə dəyişir. Böyük büdcəli şirkətlər bu tip dəstəkləri daha rahat təqdim edə bilir. Kiçik büdcəli şirkətlər isə imkanları daxilində bu tələblərə uyğun həllər tapmağa çalışırlar. Məsələn, daha rahat iş saatları, uyğun iş şəraiti və digər sadə imkanlar belə imtiyaz kimi qiymətləndirilə bilər. Yeni iş axtarışında olan, karyerasına yeni başlayan şəxslərin adətən imtiyaz tələbləri az olur. Amma karyera pillələri yüksəldikcə və rəhbər vəzifələrə çatdıqca bu tələblər artır – bu isə tamamilə normal haldır. Şirkətlər bu kimi tələbləri qarşılamağa çalışmalıdır. Ən azı tibbi sığortanı, komfortlu iş şəraitini təmin etməli, əməkdaşlarını təlim və təcrübə proqramlarına göndərməlidir. Əgər imkan varsa, idman və sağlamlıq proqramlarına da cəlb olunmaları təmin edilməlidir"- deyə İ.Mirzəzadə bildirir.