"Cursor"un illik gəliri 2 milyard dolları keçib

2022-ci ildə yaradılan süni intellekt əsaslı kodlama platforması "Cursor" gəlirlərini sürətlə artırmaqda davam edir.

Valyuta.az xəbər verir ki, şirkət son üç ayda gəlirini iki dəfə artıraraq illik gəlirini 2 milyard dollar səviyyəsinin üzərinə çıxarıb. Xatırladaq ki, "Cursor" ötən ilin noyabrında 29,3 milyard dollar dəyərləndirmə ilə 2,3 milyard dollar investisiya cəlb edib.

Son həftələrdə sosial mediada şirkətin artım tempinin zəiflədiyi barədə iddialar səslənsə də, gəlirlərin əsas hissəsi artıq korporativ müştərilərdən formalaşır. Bildirilir ki, ümumi gəlirin təxminən 60%-i məhz iri şirkətlərin payına düşür. "Cursor" əvvəlcə fərdi proqramçılara fokuslansa da, son bir ildə strategiyasını böyük müəssisələrə yönəldib.

Bazar rəqabəti isə yüksək olaraq qalır. Platforma "OpenAI" "Codex", "Replit", "Cognition" və "Lovable" kimi alətlərlə eyni seqmentdə mübarizə aparır.

Şirkət tərəfindən məsələ ilə bağlı hələlik rəsmi açıqlama verilməyib.

Sərvanə Rəmixanova