"Paramount" platformalarını birləşdirməyi planlaşdırır

ABŞ-ın media nəhəngi "Paramount" "Warner Bros. Discovery"ni satın alma prosesindən sonra "Paramount+" və "HBO Max" platformalarını vahid rəqəmsal xidmət altında birləşdirməyi planlaşdırır.

Valyuta.az xəbər verir ki, şirkətin baş direktoru Devid Ellison investorlarla görüşdə bildirib ki, satınalma prosesi tamamlandıqdan sonra hər iki platforma birləşdirilərək tək yayım xidməti yaradılacaq. Bununla da həm "Paramount"un, həm də "HBO"nun geniş məzmun kataloqu eyni platformada təqdim ediləcək.

"Paramount" rəhbərliyi qeyd edib ki, "HBO" brendinin kimliyi qorunacaq və yüksəkkeyfiyyətli məzmun istehsalı davam etdiriləcək.

Bu addımın əsas məqsədi "Netflix" kimi rəqiblərlə daha güclü rəqabət aparmaq, abunəçi bazasını genişləndirmək və daha zəngin məzmun portfeli formalaşdırmaqdır.

Ekspertlər bu qərarı rəqəmsal yayım sektorunda davam edən konsolidasiya prosesinin bir hissəsi kimi qiymətləndirirlər. Birləşmiş platformanın mövcud istifadəçilərə necə təsir edəcəyi ilə bağlı isə hələlik rəsmi açıqlama verilməyib.

Sərvanə Rəmixanova