TSMC səbəbindən "iPhone"ların qiyməti artacaq

Ən böyük yarımkeçirici istehsalçısı olan TSMC əsas müştərilərinə, o cümlədən "Apple" şirkətinə, məhsullarının qiymətinin artırılacağı barədə bildiriş göndərib. 

Valyuta.az xəbər verir ki, bu barədə "MacRumors" nəşri məlumat yayıb.

Yeni şərtlərə əsasən, bu artım beş nanometrdən aşağı olan qabaqcıl texnoloji proseslərə təsir edəcək. Həmin texnologiyalar "iPhone" üçün A seriyalı və "Mac" üçün M seriyalı çiplərin istehsalında istifadə olunur. Qiymət artımı 8–10 faiz civarında olacaq və gələn ildən qüvvəyə minəcək.

Xüsusilə 2 nanometrlik texnoloji prosesə keçid zamanı xərclərin daha ciddi artacağı gözlənilir. Hesabatlara əsasən, TSMC sifarişçiləri xəbərdar edib ki, 2 nanometrlik çiplərin qiyməti 3 nanometrlik prosessorlardan ən azı 50 faiz yüksək olacaq. Bu vəziyyət yeni texnoloji prosesi mənimsəmək üçün tələb olunan çox yüksək kapital xərcləri və istehsalın ilkin mərhələsində endirim strategiyasının olmaması ilə izah edilir.

Proqnozlara görə, 2 nanometrlik texnologiya ilə istehsal olunacaq flaqman mobil çiplərin maya dəyəri kütləvi istehsal başladıqdan sonra hər vahid üçün təxminən 280 dollar təşkil edəcək. Bu, həmin çipləri "iPhone"un ən bahalı komponentinə çevirəcək və əgər "Apple" əlavə xərcləri istehlakçılara ötürməzsə, şirkətin mənfəətinə ciddi təsir göstərəcək.

Artan istehsal xərcləri fonunda "Apple" 2 nanometrlik çipləri yalnız bəzi "iPhone 18" modellərində — məsələn, Pro və Pro Max versiyalarında — tətbiq edə bilər. Analitiklər daha əvvəl xəbərdarlıq etmişdilər ki, iqtisadi səmərəlilik baxımından bütün yeni "iPhone 18" modelləri növbəti nəsil prosessorlarla təchiz edilməyə bilər.

Paşa Məmmədli