“TikTok”un qurucusu Asiyanın ikinci ən varlı şəxsi oldu

“ByteDance” şirkətinin həmtəsisçisi və “TikTok”un yaradıcısı Canq İminq sərvətini artıraraq Hindistanın milyarder iş adamı Mukeş Ambanini geridə qoyub və Asiyanın ikinci ən varlı şəxsinə çevrilib.

Valyuta.az xəbər verir ki, bu barədə “Bloomberg Billionaires Index” məlumat yayıb.

Məlumata görə, “ByteDance” şirkətinin dəyərinin artması və şirkətin süni intellekt sahəsində əldə etdiyi irəliləyişlər Canq İminqin sərvətinin əhəmiyyətli dərəcədə yüksəlməsinə səbəb olub.

Hazırda onun sərvəti 92,8 milyard dollar qiymətləndirilir. Bununla da Canq İminq Çinin ən varlı şəxsi statusunu daha da möhkəmləndirib.

“Bloomberg”in məlumatına əsasən, Canq İminqin sərvəti 2019-cu ilin mart ayından bəri yeddi dəfədən çox artıb. Həmin dövrdə onun sərvəti təxminən 13 milyard dollar səviyyəsində qiymətləndirilirdi.

Analitiklər hesab edirlər ki, süni intellekt texnologiyalarına artan maraq və “ByteDance”in bu sahədəki investisiyaları şirkətin bazar dəyərinin yüksəlməsinə, nəticədə isə onun qurucusunun sərvətinin sürətlə artmasına mühüm təsir göstərib.

Sərvanə Rəmixanova