Süni intellekt 2026-da bütün qaydaları dəyişəcək

Texnologiyaların sürətlə irəliləməsi və süni zəkanın gündəlik iş proseslərinin mərkəzinə yerləşməsi rəqəmsal marketinq dünyasında köklü dəyişikliklərə səbəb olur. 

Valyuta.az xəbər verir ki, son illərdə təməli qoyulan bir çox rəqəmsal texnologiyanın 2026-cı ildə yetkinləşməsi ilə hiperşəxsiləşdirmə, avtonom marketinq sistemləri və duyğu yönümlü reklamcılıq əsas trendlər kimi ön plana çıxır.

"Ajans Dijital Kalem"in məlumatına görə, süni intellekt modelləri 2026-cı ildən etibarən yalnız məlumatı təhlil edən strukturlar olmaqdan çıxaraq kampaniyanı dizayn edən, variasiyalarını hazırlayan, test edən və optimallaşdıran tam avtonom sistemlərə çevrilir. Bu sistemlər istifadəçi davranışını və satınalma niyyətini real vaxtda oxuyaraq reklam büdcələrini saniyələr içində düzgün kanallara yönləndirir. Kampaniya vizuallarını və ya hədəfləməni anlıq performansa uyğun şəkildə avtomatik dəyişə bilən bu mexanizmlər effektivliyi artırır.

Mütəxəssislər bildirirlər ki, əvvəllər məlumat marketinqi idarə edirdisə, bu gün marketinqi tamamilə avtonom sistemlər yönləndirir.

2026-cı ildə ən böyük sıçrayış istifadəçinin nə etdiyinə deyil, nə hiss etdiyinə fokuslanmaq olacaq. Demoqrafik hədəfləməni geridə qoyan emosional analiz modelləri istifadəçinin əhvalını rəqəmsal davranış siqnallarından müəyyən edir. Bununla, istifadəçinin həmin andakı emosiyasına uyğun məzmun göstərilərək reklamın təsir gücü artırılır.

Bununla yanaşı, XR+ texnologiyası brendlərin təcrübə yönümlü marketinqdə yeni mərhələyə keçməsinə imkan yaradır. Artıq virtual reallıq dokunsal titrəyişlər, məkan səsi və hətta qoxu simulyasiyası ilə dəstəklənir.

Çərəzsiz internet dövrünün güclənməsi ilə brendlər istifadəçinin könüllü təqdim etdiyi məlumatı ağıllı saatlar və geyilə bilən texnologiyalardan gələn biometrik siqnallarla birləşdirməyə başlayıb. Bu isə kampaniyaların istifadəçinin real vaxt ehtiyaclarına görə yenilənən hiperşəxsiləşdirilmiş modellərə çevrildiyi anlamına gəlir.

Bundan başqa, geniş auditoriyaya yönələn kütləvi kommunikasiya öz yerini daha kiçik, lakin yüksək bağlılığa malik nano-icmalara hədəflənmiş strategiyalara verir. Bu icmalar brendlərə xüsusi məzmunlar və təcrübə əsaslı tədbirlər vasitəsilə daha dərin bağlar qurmağa imkan yaradır. Mütəxəssislərə görə, artıq səmimiyyət məlumatla sübut edilməlidir və qərarlarını məlumat əsasında verən brendlər üstünlük qazanır.

Paşa Məmmədli