"Honda" "Nissan"ı almaq üçün icraçı direktorun istefasını gözləyir

"Honda" "Nissan"ın baş icraçı direktoru (CEO) Makoto Uçida vəzifəsindən ayrıldığı təqdirdə, birləşmə müzakirələrinə yenidən qayıtmağa açıq olduğunu bildirib.

Valyuta.az xəbər verir ki, məsələyə yaxın mənbələrin məlumatına görə, "Honda" Uçidanın istefası halında dünyanın dördüncü ən böyük avtomobil istehsalçısını yaratmaq üçün satınalma danışıqlarına davam etməyə hazırdır.

Uçida "Nissan" daxilində "Honda" ilə əməkdaşlığın ən böyük tərəfdarlarından biri idi. Lakin onun "Honda"nın baş icraçı direktoru Toşihiro Mibe ilə münasibətləri, "Honda"nın "Nissan"ın yenidən qurulma prosesinin sürəti və maliyyə problemlərinin dərinliyi ilə bağlı narazılığı səbəbindən pozulub.

Birləşmə danışıqları, "Honda"nın "Nissan"ın ayrıca bir holdinq şirkəti yaratmaq əvəzinə tamamilə "Honda"nın törəmə müəssisəsi olmasını tələb etməsi və iki şirkətin "bərabər şərtlərdə" olmasını istəməsi səbəbindən dayanmışdı.

Mənbələrdən birinə görə, "Honda" daxili müxalifəti daha yaxşı idarə edə biləcək yeni bir rəhbərlik altında müzakirələri yenidən başlatmağa hazırdır. 2026-cı ilə qədər vəzifəsində qalmaq istədiyini bildirən Uçida 58 milyard dollarlıq birləşmə müzakirələrinin uğursuzluğa düçar olmasından sonra, idarə heyəti üzvləri və "Renault"dakı tərəfdaşlarından istefa etməsi üçün təzyiq görür.

Məsələyə yaxın mənbələrdən biri, "Nissan" idarə heyətinin Uçidanın ayrılma vaxtı ilə bağlı qeyri-rəsmi müzakirələrə başladığını bildirib.

Paşa Məmmədli