“Qohumbazlıq iş mühitində mənfi motivasiya yaradır” - Ekspert

İş mühitində ədalət və şəffaflıq motivasiyanın əsas şərtidir. Qərarların peşəkar meyarlarla deyil, şəxsi münasibətlərlə verildiyi mühitdə isə bu balans pozulur. Qohumbazlıq təkcə kadr məsələsi deyil, komanda ruhuna və ümumi performansa təsir edən amilə çevrilir.

Qohumbazlıq digər işçilərin motivasiyasını və nəticələrini necə dəyişir?

İnsan Resursları üzrə mütəxəsis İlkin Mirzəzadə Valyuta.az-a bildirir ki, ümumiyyətlə, qohumbazlıq, tərəf tutma, yerlibazlıq və s. kimi proseslər ofis mühitində həmişə mənfi motivasiyanın yaranmasına səbəb olur:

“Əgər qohumbazlıq xüsusilə həmin şəxsin digər işçilər qarşısında daha çox önə çıxmasına səbəb olursa, həmin şəxs ödənişlərdə (əməkhaqqında), vəzifə artımında və digər proseslərdə önə çıxırsa və haqsız rəqabət mühiti yaranırsa, təbii ki, bu, mənfi motivasiyanın yaranmasına səbəb olacaq. Bununla bərabər, işçilərin incik şəkildə işdən ayrılmasına, işçilərin ümumi performansının düşməsinə səbəb olacaq. Yəni sırf bu kimi problemlər yaranacaq”.

“Ona görə də, tövsiyə olunur ki, bu kimi hallardan ofis mühitində, iş mühitində istifadə olunmasın. Bu olarsa, qısamüddətli ciddi hadisələr olmasa belə, uzunmüddətli perspektivdə iş yerinə hər bir halda mənfi təsir edəcək. Həm mənfi motivasiya atmosferi yaranacaq, həm də şirkət yaxşı işçiləri itirəcək” - deyə İ.Mirzəzadə qeyd edir.

Tənzilə Ağabalayeva