Etsy "Depop"u 1,2 milyard dollara "eBay"a satır

Böyük Britaniyada əsası qoyulmuş və Z nəsli arasında populyarlıq qazanan ikinci əl geyim tətbiqi "Depop" 1,2 milyard dollar (890 milyon funt sterlinq) qarşılığında "eBay"a satılır.

Valyuta.az xəbər verir ki, onlayn ticarət platforması "Etsy" şirkəti "Depop"u beş il əvvəl 1,6 milyard dollara satın almışdı. Şirkət indi bu aktivi satışa çıxararaq strategiyasında dəyişiklik edir.

30 ildən artıq fəaliyyət göstərən "eBay" bildirib ki, razılaşma genişlənən yenidən satış bazarında daha gənc auditoriyaya çıxış imkanlarını artıracaq. Son illərdə istifadə olunmuş və ya “sevilərək istifadə edilmiş” geyim və ayaqqabıların alqı-satqısına maraq artıb. Gənc istehlakçılar daha sərfəli və ekoloji baxımdan dayanıqlı seçimlərə üstünlük verirlər.

Bununla belə, "Depop" son dövrlərdə "Vinted" kimi rəqib platformaların güclənməsi fonunda bazar dəyərinin azalması ilə üzləşib. Analitiklərin fikrincə, istifadəçilər üçün əsas üstünlük alqı-satqı prosesinin sadə və əlçatan olmasıdır və bu sahədə rəqabət daha da kəskinləşib.

Tam nağd ödəniş əsasında həyata keçiriləcək razılaşmanın bu ilin ortalarınadək başa çatdırılması planlaşdırılır. "Depop" öz adını və brendini qoruyacaq.

Məlumat "eBay"ın 2025-ci il üzrə maliyyə nəticələrinin açıqlanması ilə eyni vaxta təsadüf edib. Şirkətin gəlirləri illik müqayisədə 8% artaraq 11,1 milyard dollara yüksəlib. Xəbərdən sonra "Etsy" və "eBay" səhmlərində artım qeydə alınıb.

"Etsy"nin açıqlamasına görə, "Depop"un yeddi milyon aktiv alıcısının təxminən 90%-i 34 yaşdan aşağıdır. Platformanın üç milyondan çox aktiv satıcısı mövcuddur.

Tənzilə Ağabalayeva