"Paşa Bank"ın xalis mənfəəti 60 milyondan çox azalıb

Paşa Bank 2025-ci ili 148,9 milyon manat xalis mənfəətlə başa vurub. Bu, 2024-cü ilin nəticəsi ilə müqayisədə 61,6 milyon manat və ya 29,3% azdır.

Valyuta.az xəbər verir ki, bankın maliyyə nəticələrində təkcə xalis mənfəət deyil, əsas gəlir göstəricilərində də geriləmə müşahidə olunub.

Ticarət və investisiya qiymətli kağızlarından əldə olunan faiz gəlirləri 2025-ci ildə 114,5 milyon manat təşkil edib ki, bu da əvvəlki ilə nisbətən 12 milyon manat və ya 9,5% azalma deməkdir. Bankın xalis faiz gəliri də 3,4% azalaraq 344,7 milyon manata düşüb. Əməliyyat mənfəəti isə illik müqayisədə 11,9 milyon manat azalıb və 250,5 milyon manat səviyyəsində qeydə alınıb.

Bununla belə, bankın kredit portfelində artım müşahidə olunub. 2025-ci ilin sonuna müştərilərə verilmiş kreditlərin həcmi 3 milyard 432 milyon manata çatıb ki, bu da 2024-cü illə müqayisədə 128,8 milyon manat və ya 3,9% çoxdur. Amma istehlak kreditləri üzrə göstərici 16,9% azalaraq 75,1 milyon manata enib.

2025-ci ilin sonuna Paşa Bankın cəmi aktivləri 9 milyard 407 milyon 313 min manat təşkil edib. Bu, 2024-cü ilin eyni dövründəki 8 milyard 220 milyon 178 min manatla müqayisədə 1 milyard 187 milyon manat və ya 14,4% artımdır. Cəmi öhdəliklər də eyni dövrdə 7 milyard 313 milyon 303 min manatdan 8 milyard 489 milyon 548 min manata yüksəlib.

2025-ci ilin sonuna nağd pul vəsaitləri və onların ekvivalentləri 956 milyon manat təşkil edib. Bu, əvvəlki ilin analoji göstəricisindən 465,9 milyon manat və ya 32,8% azdır.

Mayya Hüseynova