Mark Kuban yeni məzunlara böyük şirkətlər əvəzinə kiçik bizneslərdə işləməyi tövsiyə edir

Milyarder investor və "Shark Tank" televiziya şousunun keçmiş ulduzu Mark Kuban yeni məzunlara iş axtararkən kiçik və orta bizneslərə (KOB) yönəlməyi tövsiyə edib. O, bu fikrini çərşənbə günü sosial media platforması X-də yayımladığı paylaşımda bildirib.

Kuban hesab edir ki, yeni məzunlar məhz KOB-larda ən çox dəyər yarada bilərlər. Onun sözlərinə görə, bu məzunlar kiçik müəssisələrə süni intellekt agentlərindən necə istifadə etməyi öyrədə və bu yolla əvvəllər vaxt və ya vəsait çatışmazlığı səbəbindən yerinə yetirilməyən prosesləri optimallaşdıra bilərlər.

"Bu sahədə böyük şirkətlərin yeni məzunlara ehtiyacı yoxdur," – deyə Kuban vurğulayıb. "Sahibkarlıq ruhuna malik şirkətlər isə sizin qatacağınız dəyəri sevəcəklər."

O əlavə edib ki, iş axtaranlar süni intellekt agentlərinin elə bir sahə olduğunu anlamalıdırlar ki, burada məzunlar "şirkətlərin ehtiyac duyduğunu belə bilmədiyi" şəkildə dərhal fayda verə bilərlər.

Süni intellekt agentlərinə maraq artır

Süni intellekt agentləri – istifadəçinin müdaxiləsinə ehtiyac olmadan başdan sona qədər vəzifələri müstəqil şəkildə yerinə yetirən virtual köməkçilərdir.

2025-ci ildə bu texnologiyaya maraq əhəmiyyətli dərəcədə artıb. Məsələn, proqram mühəndisliyi idarəetmə xidməti olan Jellyfishin 400-dən çox şirkət arasında keçirdiyi araşdırmaya görə, agentik süni intellekt texnologiyasının tətbiqi 2024-cü ilin dekabrında 50% olduğu halda, 2025-ci ilin mayında bu göstərici 82%-ə yüksəlib.

Nvidia şirkətinin baş direktoru Jensen Huanq bu ilin yanvar ayında çıxışında “Agentik süni intellekt dövrü başlayıb,” – deyə bəyan etmişdi. OpenAI rəhbəri Sem Altman isə bu texnologiyanı gənc əməkdaşlara bənzətmişdi.

Morqan Stanley isə 2025-ci ilin noyabrında dərc etdiyi qeyddə bildirib ki, süni intellektlə çalışan alış-veriş agentləri 2030-cu ilə qədər ABŞ-ın elektron ticarət sektoruna 115 milyard dollar əlavə dəyər qazandıra bilər.

Yeni məzunlar üçün çətin əmək bazarı

Kubanın bu açıqlamaları yeni məzunların az sayda vakansiyanın olduğu bir əmək bazarına daxil olduğu vaxtda səsləndirilib. Kaliforniyada yerləşən məşğulluq platforması "Handshake"-in 2025-ci ilin mayında paylaşdığı məlumatlara əsasən, platformadakı vakansiya elanları əvvəlki ilə nisbətən 15% azalıb, hər bir vakansiya üçün edilən müraciətlərin sayı isə 30% artıb.

Eyni zamanda, "Handshake" qeyd edib ki, platformada yeni məzunlar tərəfindən edilən tam ştatlı iş müraciətlərinin üçdə birindən çoxu 250 və ya daha az işçisi olan şirkətlərə ünvanlanıb.

Bundan əlavə, kiçik şirkətlər Z nəsli məzunlarını cəlb etmək üçün onlara önəm verdikləri bir imkan – evdən işləmə şəraiti – təklif edirlər. Business Insiderə danışan əmək bazarı tədqiqatçıları bildiriblər ki, bu şirkətlər böyük korporasiyalarla rəqabət aparmaq üçün daha elastik iş rejimləri təqdim edirlər.

Tənzilə Ağabalayeva