İntriqalı işçi peşəkardırsa, işə götürək? - Ekspert

Müasir iş mühitində kollektivin dinamikası və daxili münasibətlər uğurun əsas amillərindən biri hesab olunur. Bəzən iş prosesində yaranan gərginliklər, anlaşılmazlıqlar və fikir ayrılıqları müəyyən davranış modellərini gündəmə gətirir. Bu davranışlar hər zaman açıq şəkildə görünməsə də, zamanla komanda işinin pozulmasına səbəb ola bilir. Xüsusilə də bəzi intriqalı əməkdaşların fərdi yanaşmaları və ünsiyyət tərzi bu prosesdə diqqət mərkəzinə çevrilir.

İnsan resursları üzrə mütəxəssis Nüsrət Xəlilov Valyuta.az-a bildirib ki, əgər namizədin kollektiv və müştəri ilə işlədiyi vəziyyətlərdə ünsiyyət bacarıqları vacibdirsə, bu zaman həmin şəxsin kommunikasiya problemi və intriqalı davranış sərgiləməsi komanda üçün ciddi mənfi təsir yarada bilər:

“Komandada digər amillər müsbət olsa belə, daxili kommunikasiya problemi səbəbindən istənilən nəticəyə çatmaq çətinləşəcək. Əgər namizəd yalnız fərdi şəkildə işləyirsə və əsasən rəhbərlə ünsiyyətdə olursa, bu hal müəyyən qədər qəbul edilə bilər. Lakin bu, yenə də problemdir”.

Bəs bu cür hallar müsahibələrdə necə müəyyən edilir?

"Belə hallarda situasiya müsahibəsi keçirilə bilər. Hər hansı bir vəziyyət simulyasiya olunaraq müqayisəli şərait yaradılır və həmin anda namizədin reaksiyasına əsasən onun davranış tərzi və intriqa meyilli olub-olmaması qiymətləndirilə bilər”, – deyə o qeyd edib.

Tənzilə Ağabalayeva