Harvard Universitetinin azərbaycanlı tələbəsinin startapı 1 milyon dollar investisiya cəlb etdi

Azərbaycanın süni intellekt sahəsində fəaliyyət göstərən "Luron AI" startapı Pre-Seed mərhələsində 1 milyon ABŞ dolları həcmində investisiya cəlb edib. 

Valyuta.Az-ın verdiyi xəbərə görə, maliyyələşmə turunda "e2vc" və "TQ Ventures" vençur fondları iştirak edib.

"Luron AI" — süni intellekt sahəsində fəaliyyət göstərən texnologiya startapıdır. Şirkət çağrı mərkəzlərinin (call center) işinin avtomatlaşdırılması üçün daim aktiv olan, çoxdilli səsli süni intellekt agentləri hazırlayır.

Startap Harvard Universitetinin tələbəsi Şəms Polat (Müslümov) və Berkley Universitetində təhsil alan Mert Kaan Atan tərəfindən təsis olunub. 

"Luron AI" tərəfindən hazırlanmış həll yolu daxil olan və çıxan zənglərin avtomatik idarə olunmasına, potensial müştərilərin (lead) ilkin qiymətləndirilməsinə, müştərilərin qəbula yazılmasına, həmçinin istifadəçilərlə SMS, çat və elektron poçt vasitəsilə 24/7 rejimində əlaqə qurulmasına imkan verir. Platforma korporativ müştərilər üçün AI-native infrastruktur prinsipi əsasında qurulub.

Şirkət cəlb etdiyi investisiyanı məhsulun inkişafına, komandanın genişləndirilməsinə və beynəlxalq bazarlarda, xüsusilə ABŞ və Türkiyə bazarlarında fəaliyyətin genişləndirilməsinə yönəltməyi planlaşdırır.

Aydın