Hakerlərin yeni silahı: pulsuz fayl çeviricilər!

ABŞ Federal Təhqiqat Bürosu (FTB) pulsuz internet əsaslı fayl çeviricilər, fayl birləşdiricilər və digər məhsuldarlıq alətlərinin hakerlər tərəfindən məlumat oğurluğu və zərərli proqram hücumları üçün istifadə edildiyini açıqlayıb.

Valyuta.az xəbər verir ki, FTB-nin Denver Saha Ofisi bu barədə rəsmi açıqlama yayımlayaraq, çevrimçi pulsuz fayl çeviricilərlə bağlı artan dələduzluq halları barədə xəbərdarlıq edib. Qurum, bu tip dolandırıcılıq qurbanlarının mütləq hüquq-mühafizə orqanlarına müraciət etməli olduğunu bildirib.

FTB-nin hesabatına görə, hakerlər müxtəlif pulsuz fayl çevirmə və yükləmə xidmətləri vasitəsilə istifadəçiləri aldadaraq cihazlarına zərərli proqramlar yükləyirlər.

Şübhəli xidmətlər aşağıdakı funksiyaları təklif etdiklərini iddia edirlər:

.doc sənədlərini .pdf formatına çevirmək;
.jpg şəkillərini .pdf faylına birləşdirmək;
MP3 və MP4 yükləmə xidmətləri təqdim etmək.

Ancaq bu xidmətlərdən istifadə edən şəxslər fayl çevirdiklərini düşünərkən, fərqində olmadan cihazlarına virus və ya casus proqramlar yükləyə bilərlər.

Təhlükəsiz platformalar seçilməlidir

FTB bu cür onlayn alətlərdən istifadə edərkən yalnız etibarlı və tanınmış platformalara üstünlük verilməsinin vacibliyini vurğulayır.

Bu tip dolandırıcılıqlarda, fayl çevirilməsi uğurla tamamlanmış kimi görünsə də, yüklənən fayllara virus və ya digər zərərli proqramlar əlavə edilə bilər. Bu proqramlar:

Cihazlara ziyan vurmaq,
Şəxsi məlumatları oğurlamaq,
Fidyə proqramı hücumlarına şərait yaratmaq üçün istifadə edilə bilər.

Mütəxəssislər xəbərdarlıq edir ki, istifadəçilər məlumat təhlükəsizliyi və şəxsi məlumatlarının qorunması üçün etibarlı platformalardan istifadə etməli, şübhəli sayt və xidmətlərdən uzaq durmalıdırlar.

Bundan əlavə, dələduzluq qurbanlarının hüquq-mühafizə orqanlarına məlumat vermələri tövsiyə olunur. Siber təhlükəsizlik mütəxəssisləri rəqəmsal fəaliyyətlərdə daha diqqətli olmağa və güvənilməyən platformalardan çəkinməyə çağırır.

Paşa Məmmədli