"Google Chrome" pullu xidmətə keçə bilər

İnternetdə gəzmə vərdişlərimizi kökündən dəyişən "Google Chrome" uzun illərdir pulsuz təcrübə təqdim edərək dünyanın ən populyar brauzerinə çevrilib. Lakin 2026-cı il bu vərdişin dəyişməyə başladığı il kimi tarixə düşə bilər. 

Valyuta.az xəbər verir ki, "Google"un üzərində işlədiyi və “vasitəçi (agentli) süni intellekt” adlandırılan yeni nəsil xüsusiyyətlərin, hamı üçün açıq olmadan əvvəl ödəniş divarının arxasında gizlədiləcəyinə dair güclü siqnallar var.

Hələlik rəsmi açıqlama verilməsə də, brauzerin kodları arasında gizlədilmiş ipucları "Chrome"un ən ağıllı xüsusiyyətlərinə çıxış üçün aylıq abunə haqqı ödəməli ola biləcəyimizi göstərir.

Əslində süni intellekt artıq "Chrome"un içinə daxil olub. Mövcud "Gemini" xüsusiyyəti sayəsində istifadəçilər ayrıca pəncərə açmadan veb saytları xülasə edə, "YouTube" videolarını təhlil edə və baxış tarixçəsi üzərindən sorğular verə bilirlər. Lakin sızdırılan yeni məlumatlar bu təcrübəni bir addım irəli aparan “vasitəçilər – agentlər” dövrünə işarə edir. Bu sistem təkcə məlumat vermir, sizin adınıza internetdə gəzir, restoran rezervasiyası edir, alış-veriş səbətini doldurur və hətta ödənişi tamamlayır. Məhz bu mürəkkəb və yüksək hesablama gücü tələb edən proseslər "Google"un ödənişli "AI Pro" və ya "AI Ultra" paketlərinə məxsus ola bilər.

2025-ci il "Perplexity Comet" və "ChatGPT Atlas" kimi süni intellekti mərkəzə alan yeni nəsil brauzerlərin yüksəlişi ilə əsl dönüş nöqtəsi olub. "Google" da bu yarışda geri qalmamaq üçün "Chrome"u sadə brauzerdən, istifadəçisi adından qərarlar verə bilən süni intellekt assistentinə çevirməyə çalışır. Bu cür inkişaf etmiş xüsusiyyətlərin niyə ödənişli ola biləcəyi isə xərclərlə izah olunur. Sadə bir çatbotla yazışmaqla bir botun sizin yerinizə internetdə əməliyyatlar aparması arasında ciddi server yükü fərqi mövcuddur. Hazırda bu inkişaf etmiş imkanların aylıq 20 dollardan başlayan peşəkar paket sahiblərinə təqdim ediləcəyi gözlənilir.

Bununla belə, bu vəziyyət "Chrome" istifadəçiləri üçün tamamilə pis xəbər sayılmır. "Google"un strategiyası adətən yenilikləri əvvəlcə ödənişli istifadəçilərə təqdim etmək, texnologiya yetkinləşdikcə və xərclər azaldıqca isə hamı üçün açmaq üzərində qurulub. Məsələn, "Chrome" daxilindəki ilk "Gemini" xüsusiyyətləri də bir vaxtlar ödənişli abunə tələb edirdi, lakin hazırda hamı tərəfindən pulsuz istifadə olunur. Buna görə də bu “ağıllı vasitəçilər"in bir gün bütün "Chrome" istifadəçiləri üçün standart hala gəlməsi güclü ehtimaldır. Amma hələlik görünən odur ki, texnologiyanın ön cəbhəsində olmaq istəyənlər bir müddət cibini açmalı olacaq.

Paşa Məmmədli