GECF: Türkiyənin qaz hasilatı 2050-ci ilədək 8 dəfə artacaq

Türkiyənin təbii qaz hasilatının 2050-ci ilə qədər illik 13 milyard kubmetrə çatacağı proqnozlaşdırılır.

Report xarici mətbuata istinadən xəbər verir ki, bu barədə Qaz İxrac Edən Ölkələr Forumunun (GECF) hesabatında bildirilib.

Məlumata görə, Türkiyənin qaz hasilatındakı artım əsasən Qara dəniz qaz sahəsinin hesabına formalaşacaq: “Hazırda Türkiyə 2020-ci ildə kəşf edilən 710 milyard kubmetr təbii qaz ehtiyatı olan yatağın işlənməsini həyata keçirir. 2023-cü ilin aprel ayında "Sakarya" yatağından alınan qazın, qurudakı emal kompleksinə bağlı boru kəməri vasitəsilə milli şəbəkəyə vurulmasına başlanılıb. Qara dəniz qaz sahəsi tam gücü ilə işləyəndən sonra Türkiyənin illik qaz ehtiyacının təxminən 30 %-ni qarşılayacaq”.

“Sakarya" qaz yatağından hasilatın bu il 1,6 milyard kubmetrə, birinci mərhələdə hasilatın maksimum 3,5 milyard kubmetrə, ikinci mərhələdə isə 11 milyard kubmetrə çatacağı təxmin edilir.

"Sakarya" yatağının genişləndirilməsi və Cənubi Akçakoca Alt Hövzəsindəki son kəşflər ilə Türkiyə 2040-cı ilə qədər hasilatı 20 milyard kubmetrə çatdıra bilər. Ancaq, böyük kəşflər olmasa, 2050-ci ilə qədər qaz hasilatı 13 milyard kubmetrə düşə bilər”, - GECF-in hesabatında bildirilib.

Enerji istehlakında idxaldan asılı olan Türkiyə, uzun illərdir Qara dəniz və Şərqi Aralıq dənizində karbohidrogen axtarışları aparır.

Türkiyənin enerji və təbii sərvətlər naziri Alparslan Bayraktar bildirib ki, Türkiyə bu il Qara dənizdə 3 kritik karbohidrogen kəşfiyyatı həyata keçirməyi planlaşdırır və bununla da, o, 2024-cü ildə potensial yeni enerji kəşflərinə işarə edib.

Avropanın qalan hissəsi ilə boru kəməri şəbəkəsi və 3 reqazifikasiya terminalları ilə birləşən Türkiyə regional mərkəz olmağa bir addım da yaxınlaşıb.

Rusiya və Türkiyə 2022-ci ildən Türkiyədə beynəlxalq qaz qovşağının yaradılmasını müzakirə edir və Rusiya qazı bu təşəbbüsdə mühüm rol oynayır.

Türkiyə 2022-ci ildə 54 milyard kubmetr təbii qaz idxal edib ki, bunun da 72 %-i boru kəmərləri vasitəsilə ilə nəql edilib.

Türkiyənin təbii qaz idxalı 2050-ci ilə qədər illik 55 milyard kubmetrə çatacaq.

2022-ci ildə Türkiyənin qaz hasilatına yatırılan investisiyalarda böyük artım müşahidə olunub. Belə ki, 2022-ci ildə əsasən Qara dənizdəki "Sakarya" layihəsinin birinci fazasına yatırılan sərmayələrlə qaz hasilatına investisiyalar 1,6 milyard ABŞ dolları artaraq 2,3 milyard ABŞ dollarına çatıb.

"Uzunmüddətli perspektivdə Türkiyədə kəşf və hasilata 8,7 milyard ABŞ dollarlıq kapital qoyuluşu ilə 13 milyard kubmetr qaz hasilatına çatacağı gözlənilir”, - hesabatda bildirilib.