Bu investisiya şirkəti ardıcıl ikinci ildir, səhm əməliyyatı aparmayıb

“MFX-Trading İnvestisiya Şirkəti”də birja dövriyyəsi azalan 4 investisiya şirkətlərindən biri olub.

Valyuta.az xəbər verir ki, şirkət 2025-ci ilin yanvar-dekabr aylarında Bakı Fond Birjasında ümumilikdə 78 əqd üzrə 197 milyon 891 min 264 manatlıq əməliyyat həyata keçirib. Bu göstərici əvvəlki ilin eyni dövrü ilə müqayisədə 63,72% və ya 347 milyon 583 min 436 manat azalma deməkdir.

Xatırladaq ki, 2024-cü ilin yanvar-dekabr aylarında şirkət 349 əqd üzrə ümumilikdə 545 milyon 474 min 700 manatlıq dövriyyə formalaşdırmışdı.

Hazırkı statistikaya görə, “MFX-Trading”in bir əqd üzrə orta əməliyyat dəyəri 2 milyon 537 min 64 manat təşkil edib. Bu isə illik müqayisədə 62,3%-lik artıma bərabərdir.

Portfel strukturu baxımından, şirkətin əsas fəaliyyəti repo əməliyyatları və Azərbaycan Respublikası Mərkəzi Bankının (ARMB) qiymətli kağızları ilə aparılıb. Belə ki, ümumi dövriyyənin 98,8 milyon manatı repo, 60,7 milyon manatı isə ARMB kağızlarının payına düşüb. Korporativ istiqrazlar 774,8 min manat, dövlət istiqrazları isə 37,7 milyon manat həcmində olub.

Qeyd edək ki, “MFX-Trading” bu il də ötən ildə olduğu kimi səhmlərlə bağlı heç bir əməliyyat aparmayıb. Son statistikaya əsasən, şirkət dövriyyəsi ən çox azalan dördüncü investisiya qurumu kimi qeydə alınıb.

Mayya Hüseynova