ABŞ-dən sonra Rusiya da kriptovalyuta qanununu hazırladı

ABŞ-dən sonra Rusiya da kriptovalyuta haqqında qanun hazırlayıb.

Valyuta.az xəbər verir ki, Rusiya kriptovalyuta bazarı ilə bağlı yeni qanun layihəsinin hazırlanmasını başa çatdırıb. Layihə kriptovalyutalara yalnız peşəkar investorların deyil, geniş ictimaiyyətin də məhdud şəkildə investisiya etməsinə imkan yaradacaq.

TASS agentliyinin məlumatına görə, yeni qanun kriptovalyutaları xüsusi maliyyə tənzimləməsi statusundan çıxarır. Bununla da kvalifikasiyalı olmayan fərdi investorlar üçün kriptovalyutalara giriş açılır.

Dövlət Dumasının Maliyyə Bazarları Komitəsinin sədri Anatoly Aksakov bildirib ki, qanun layihəsi 2026-cı ilin yanvar–iyul aylarında parlamentdə müzakirə olunacaq. Layihəyə əsasən, kvalifikasiyalı olmayan investorlar ildə maksimum 300 min rubl (təxminən 3 800 dollar) məbləğində kriptovalyuta yatırımı edə biləcəklər. Peşəkar investorlar üçün isə limit tətbiq olunmur.

Qanun həmçinin kriptovalyutalar vasitəsilə sərhədlərarası ödənişlərin və beynəlxalq əməliyyatların leqallaşdırılmasını da nəzərdə tutur. Rusiya bu addımı Qərb sanksiyalarına qarşı alternativ maliyyə aləti kimi qiymətləndirir.

Sərvanə Rəmixanova