“3%-lə götürülən kredit, 12%-lə qazanca çevrilə bilər” - Bank eksperti

Kredit bu gün müasir maliyyə sisteminin ayrılmaz hissəsinə çevrilib. Gündəlik ehtiyacların qarşılanmasından tutmuş daha böyük planların reallaşdırılmasına qədər bir çox insan maliyyə alətlərindən istifadə edir və bu alətlər arasında kredit xüsusi yer tutur. Lakin borclanma imkan yaratmaqla yanaşı, eyni zamanda fərdi maliyyə davranışına, qərarvermə prosesinə və uzunmüddətli planlara da təsir edən amilə çevrilir. 

Bəs kredit həqiqətən də maliyyə azadlığımızı əlimizdən alır?

Bank eksperti Əkrəm Həsənov Valyuta.az-a bildirir ki, maliyyə azadlığı, fəlsəfi kateqoriya sayılır. İnsanın passiv gəliri onun bütün xərclərini qarşılayır və o, istədiyi fəaliyyətlə məşğul ola bilir:

"Yəni, işləməyə və qazanc əldə etməyə məcbur olmur. Bunlar kapitalı olan, banka pul əmanət qoyan və oradan gələn faizlərlə dolanan, yaxud obyektləri olub icarəyə verən, həmçinin şirkətləri və səhmləri olan və oradan gəlir əldə edən insanlardır. Maliyyə azadlığı odur ki, insanın hər hansı bir fəaliyyətlə məşğul olmasına ehtiyac olmadan, əməkhaqqı dalınca qaçmadan gəliri olsun".

"Təbii ki, şəxs kreditlərə girmişsə, o, maliyyə cəhətdən azad ola bilməz. Belə insanlar borc almağa məhkum olurlar. Düzdür, bu bir halda mümkün ola bilər. Ola bilər ki, əmanət üzrə faiz dərəcəsi daha çoxdur, kredit üzrə isə azdır. Onda bu mümkün ola bilər. Misal üçün, şəxs Azərbaycanda əmanətlər üzrə illik təxminən 12% gəlir əldə etmək mümkündür, halbuki xaricdən cəlb olunan kreditin dəyəri təxminən 3% təşkil edə bilər. Bu halda şəxs 3%-lə götürdüyü vəsaiti ölkə daxilində daha yüksək gəlirliliklə yerləşdirərək aradakı faiz fərqindən qazanc əldə edir. Beləliklə, kredit onun üçün maliyyə yükü deyil, düzgün istifadə olunduqda əlavə gəlir yaradan bir alətə çevrilir"- deyə ekspert qeyd edir.

Tənzilə Ağabalayeva