Azərbaycan ən çox bu ölkələrdən məhsul alır – Siyahı

2025-ci ilin ilk üç ayında Azərbaycana 10 ölkədən ümumilikdə 5 milyard 662,97 milyon ABŞ dolları dəyərində məhsul idxal olunub. 

Valyuta.az xəbər verir ki, ötən ilin eyni dövründə idxalın həcmi 3 milyard 711,63 milyon dollar təşkil edib. Müqayisəyə əsasən, idxal 1 milyard 951,34 milyon dollar və ya 52,5% artıb. Bu da idxal prosesində təqribən 1,5 dəfə artım deməkdir.

Məlumata görə, məhsul tədarükü baxımından birinci yerdə Rusiya qərarlaşıb. Bu ölkədən idxal olunan məhsulların dəyəri cari ilin ilk rübündə 1 milyard 197,68 milyon dollar təşkil edib ki, bu da ümumi idxalın 21,15%-nə bərabərdir. Ötən ilin eyni dövründə bu göstərici 661,77 milyon dollar olub. Beləliklə, Rusiya ilə idxalda 81% artım, yəni təxminən 535,9 milyon dollar fərq qeydə alınıb.

İkinci yerdə Çin qərarlaşıb. Bu ölkədən idxalın həcmi 2025-ci ilin yanvar-mart aylarında 1 milyard 5,37 milyon dollar olub. Ötən ilin eyni dövründə bu rəqəm 743,73 milyon dollar təşkil edib. Nəticədə 261,64 milyon dollar və ya 35% artım müşahidə edilib.

Üçüncü yerdə isə Türkiyə yer alıb. Cari ilin ilk rübündə bu ölkədən Azərbaycana 592,89 milyon dollar dəyərində məhsul idxal olunub. Müqayisə üçün, 2024-cü ilin ilk üç ayında bu rəqəm 538,72 milyon dollar olub. Beləliklə, 54,17 milyon dollar və ya 10% artım qeydə alınıb.

Qeyd edək ki, ötən ilin eyni dövründə 15 ölkədən idxal prosesi həyata keçirilib. 

Aşağıdakı cədvəldə idxalda adı çəkilən 10 ölkə qeyd olunub.

Sərvanə Rəmixanova