Bu ilin yanvar-sentyabr aylarında yığımları azalan 6 sığorta şirkətindən biri də "Xalq Sığorta" ASC-dir. 

Valyuta.az xəbər verir ki, şirkətin sığorta yığımları bu ilin ilk doqquz ayında 16,7 milyon manat təşkil edib ki, bu da ötən ilin eyni dövrünə nisbətən 2,3 % və ya 390 min manat azdır. 

"Xalq Sığorta"nın 2024-cü ilin yanvar-sentyabr aylarında sığorta ödənişlərinin həcmini də kəskin azaldıb. Bu dövrdə sığorta ödənişləri 7,76 milyon manat olub ki, bu da ötən ilin ilk doqquz ayı ilə müqayisədə 57 % və ya 10,3 milyon manat azdır. Ötən ilin yanvar-sentyabr aylarında sığorta şirkətinin ödənişləri 18,06 milyon manat təşkil edib.  

Sığorta şirkətinin ödənişlərin kəskin azalması onun zərərliliyini azaldıb. Ötən ilin ilk doqquz ayında “Xalq Sığorta” 100 manat yığıma qarşı 106 manat ödəniş edibsə, bu il bu rəqəm 46 manata enib.

Qeyd edək ki, "Xalq Sığorta" 2004-cü ildə yaradılıb. Onun nizamnamə kapitalı 58,75 milyon manatdır. Şirkətin səhmlərinin 50%-i "İdeal Business Co." MMC-yə, 50%-i isə "Euro Standard" MMC-yə aiddir.

Pünhan