Bir çox insan hər ay müəyyən miqdarda pul yığmaq istəyir, amma bunu bacarmır. Səbəblər müxtəlif ola bilər: nəzarətsiz xərclər, impulsiv alışlar, büdcə planlamasının olmaması və s. Buna baxmayaraq, əlinə hər ay müəyyən qədər pul gələn hər bir insan yığım istəyini həyata kemirə bilər. Bəs qazanılması çətin, xərclənməsi asan olan pul üçün yığımı necə həyata keçirmək olar?

Valyuta.az pul toplamaq üçün sadə, amma effektiv strategiyaları araşdırdı.

1. Büdcə planı hazırlamaq

Pul yığmağın ən effektiv yollarından biri aydın və real büdcə planı tərtib etməkdir. Bunun üçün gəlir və xərclərin balansını müəyyən etməliyik. Təbii ki, hər gün xərcləriniz çıxır. Ona görə də zəruri və ikinci dərəcəli xərclər olaraq xərclərinizi ayırın. Aldığınız hər hansı mal və ya məhsulun nə dərəcə də lazım olduğuna baxın.

 2. 50/30/20 qaydasını tətbiq etmək

Qayda belədir: 50% – zəruri ehtiyaclar üçün (kirayə, kommunal, ərzaq və s.), 30% – şəxsi istəklər üçün (əyləncə, geyim, restoran və s.), 20% – yığım və investisiya üçün ayırın. Yığım %-ni aldığınız maaşa uyğun təyin edə bilərsiniz. Əsas odur ki, müntəzəm olaraq müəyyən məbləği kənara qoyasınız.

3. “Özünə əvvəl ödə” prinsipini tətbiq edin

Pul yığmaq üçün əksər insanlar ayın sonunda qalan məbləği toplamağa çalışır. Amma adətən o məbləğ qalmır. Bunun əvəzinə, maaş aldığınız gün müəyyən məbləği ilk olaraq yığıma ayırın. Bu, sizi xərcləri avtomatik tənzimləməyə məcbur edəcək.

4. Xərcləri izləmək üçün tətbiqlərdən istifadə edin

Pulunuzu necə xərclədiyinizi görmək üçün maliyyə idarəetmə tətbiqlərindən (Monefy, Mint, PocketGuard və s.) istifadə edə bilərsiniz. Bu proqramlar sizə lazımsız xərcləri müəyyənləşdirməyə və optimallaşdırmağa kömək edəcək.

5. Nağd pul istifadə edin

Kartla ödəniş edərkən insanlar adətən nə qədər xərclədiyini hiss etmir. Gündəlik xərcləriniz üçün nağd pul ayırın və kart istifadəsini azaltmağa çalışın. Bu, xərclərə daha çox nəzarət etməyə kömək edəcək.

6. Hədəf təyin edin

Qarşınıza müəyyən müddətdə nə qədər məbləğ toplaya biləcəyinizə dair məqsəd qoyun. Məsələn, 6 ay ərzində 1000 azn yığmaq kimi və.s. Hər dəfə ay tamam olub, qoyduğunuz məbləğ artdıqca motivasiyanız artacaq və beləliklə yığım prosesi asanlaşacaq.

7. “Xərcləmədən bir gün” qaydasını tətbiq edin

Həftədə və ya ayda ən az bir gün heç bir əlavə pul xərcləməməyə çalışın. Bu üsul həm qənaət etməyə, həm də xərcləmə vərdişlərinizi nəzarətdə saxlamağa kömək edəcək.

8. Tələskən alışlardan qaçın

Bir şey almaq istədikdə 24 və ya 48 saat gözləmə qaydasını tətbiq edin. Bu müddət ərzində həmin məhsulun sizə həqiqətən lazım olub-olmadığını daha yaxşı anlayacaqsınız. Lazım olmadığı təqdirdə pul xərcləmə ehtimalının olduğu yerlərə getməməyə diqqət edin. 

9. Yığımınızı avtomatlaşdırın

Bank hesabınızda aylıq avtomatik yığım əmri verin. Hər ay maaş kartınızdan müəyyən məbləğin ayrıca yığım hesabına köçürülməsi sizi unudub xərcləməkdən qoruyacaq.

10. Gəlirinizi artırmağa çalışın

Əgər yığım etmək çətindirsə, xərcləri azaltmaqla yanaşı, əlavə gəlir mənbələri yaratmağa çalışın. Freelancer işləmək, online biznes qurmaq və ya yeni bacarıqlar öyrənərək maaşınızı artırmaq bu prosesdə sizə kömək edə bilər.

Sərvanə Rəmixanova