"Missiya bəyanatı" bir şirkətin məqsədini, dəyərlərini və fəaliyyət istiqamətini qısa və aydın şəkildə ifadə edən təməl sənəddir.

Valyuta.az xəbər verir ki, uğurlu biznes qurmaq üçün ideyadan bazara çıxışa qədər bir çox addım lazımdır, lakin çox vaxt unudulan əsas məqam elə bu bəyanatın hazırlanmasıdır.

Kristina Rahm, “Sahibkarlıq liderliyi şəbəkəsi”nin iştirakçısı və "DRC Ventures"ın təsisçisidir. MS, PhD və EdD dərəcələrinə sahib olan Rahm sağlamlıq və rifah sahəsində qlobal miqyasda tanınan sahibkar və elmi lider kimi tanınır. O, 89 ölkədə 22 şirkət quraraq, uğurlu sahibkarlıq təcrübəsi əsasında missiya bəyanatının əhəmiyyətini ön plana çıxarır.

Missiya niyə vacibdir?

Yaxşı yazılmış missiya:

Aydın və yığcamdır

Real və həyata keçə biləndir

Uzunmüddətli planlarla uyğunlaşır

Bu, komanda üçün istiqamət göstərir, qərarları asanlaşdırır və dəyərləri qoruyur. Məsələn, “İnsanlara elmi əsaslı sağlamlıq həlləri təqdim etməklə onları gücləndirmək” missiyası məhsuldan tutmuş müştəri xidmətinədək hər sahəyə təsir göstərir.

Necə yazılmalıdır?

Sadə formul belədir:

“Missiyamız (əsas məqsəd) - bununla (yaratmaq istədiyimiz təsir) əldə etməkdir”. 

Böyük brendlərin missiya və vizyon bəyanatları bu formulun praktik nümunələridir:

"Nike"

Missiya: “Dünyadakı hər bir idmançıya ilham və yenilik gətirmək”. 

Vizyon: “İnsan potensialını artırmaq üçün mümkün olan hər şeyi etmək”. 

"Ford"

Missiya: “İnsanların hərəkət azadlığını artırmaq üçün ağıllı nəqliyyat həlləri təqdim etmək”. 

Vizyon: “Olduğunuz yer ilə olmaq istədiyiniz yer arasındakı məsafəni qısaltmaq”. 

"JPMorgan Chase"

Missiya: “Müştərilərimizə, işçilərimizə və cəmiyyətə dəyər qatmaqla dünyanın ən hörmət edilən maliyyə xidmətləri şirkəti olmaq”. 

Vizyon: “Dünyanın ən güvənilən və innovativ maliyyə qurumu olmaq”. 

Bu nümunələr göstərir ki, uğurlu missiya bəyanatları həm konkret, həm də motivasiyaedici olmalıdır. Əgər missiyanızı bir cümlə ilə izah edə bilmirsinizsə, bu sadəcə mesajdır, missiya deyil.

Niyə əvvəlcədən müəyyənləşdirilməlidir?

Missiya fəaliyyət başlamazdan əvvəl bu suallara cavab verməlidir:

Məhsulumuz məqsədə uyğundurmu?

İşə qəbul etdiyimiz namizədlər dəyərlərimizlə uzlaşırmı?

Brendimiz kimliyimizi əks etdirirmi?

Bu, şirkətin böyüyərkən əsas məqsəddən uzaqlaşmamasına kömək edir.

İnvestorlar və istedadlar üçün siqnal

İnvestorlar və mütəxəssislər artıq təkcə qazanc deyil, mənalı məqsəd də axtarır. Aydın missiya bəyanatı şirkətə olan inamı artırır, doğru istedadları cəlb edir və güclü korporativ mədəniyyət yaradır.

Mayya Hüseynova