"Warner Bros" 108 milyard dollarlıq təklifi rədd etməyə hazırlaşır

“Warner Bros. Discovery Inc.” şirkəti “Paramount Skydance Corp.” tərəfindən irəli sürülən 108 milyard dollarlıq satınalma təklifini rədd etməyi planlaşdırır.

Valyuta.az-ın “Bloomberg”ə istinadla verdiyi xəbərə görə, qərar maliyyələşdirmə mexanizmi və təklifin digər şərtləri ilə bağlı narahatlıqlarla əsaslandırılır.

Məsələdən xəbərdar mənbələrin bildirdiyinə görə, “Paramount”un təklifi son mərhələdə və rəqabətli proses fonunda təqdim olunub. Buna qədər “Warner Bros.” üçün bir neçə potensial alıcı ilə qeyri-rəsmi və rəsmi təmaslar aparılıb. Şirkət əvvəlcə media aktivlərinin mümkün konsolidasiyası çərçivəsində bazar marağını ölçüb, daha sonra konkret təkliflər mərhələsinə keçib.

Bu proses zamanı “Netflix”in təxminən 83 milyard dollarlıq təklifi idarə heyəti tərəfindən daha real və icra edilə bilən variant kimi qiymətləndirilib. Mənbələrin sözlərinə görə, “Netflix”in təklifi daha aydın maliyyə strukturu, şəffaf şərtlər və daha az risk ehtiva edib.

Məhz bundan sonra “Paramount Skydance” konsorsiumu qiyməti kəskin artıraraq təklifini 108 milyard dollara qədər yüksəldib. Bu addım bazarda rəqabəti gücləndirmək və “Warner Bros.”un idarə heyətini qərarını yenidən nəzərdən keçirməyə sövq etmək məqsədi daşıyıb.

Bununla belə, “Bloomberg”in mənbələri bildirir ki, “Warner Bros.”un idarə heyəti səhmdarlara məhz “Paramount”un təklifinin rədd edilməsini tövsiyə etməyə hazırlaşır. İdarə heyəti hesab edir ki, yüksək məbləğə baxmayaraq, bu təklif daha mürəkkəb maliyyələşdirmə sxemi və icra riski yaradır.

Xüsusilə, “Paramount”un David Ellisonun rəhbərlik etdiyi komandasının təqdim etdiyi maliyyələşdirmə planı ilə bağlı ciddi suallar mövcuddur. Mənbələrə görə, bu planın davamlılığı və borclanma səviyyəsi “Warner Bros.” rəhbərliyini narahat edən əsas məqamlardandır.

Şirkətin rəsmi mövqeyinin ABŞ vaxtı ilə çərşənbə günü səhər saatlarında açıqlanacağı gözlənilir.

Digər tərəfdən, sabiq ABŞ prezidenti Donald Trampın kürəkəni Jared Kuşnerə məxsus “Affinity Partners” investisiya şirkəti “Warner Bros.” uğrunda aparılan təklif mübarizəsindən geri çəkilib. Kuşnerin firması prosesdə “Paramount” tərəfini dəstəkləyən maliyyə tərəfdaşlarından biri kimi çıxış edirdi.