"Fed" sədri postu uğrunda yarış qızışır: Trampa yaxın yeni ad ortaya çıxdı

ABŞ Prezidenti Donald Trampın yaxın həftələrdə ABŞ Mərkəzi Bankının (Fed) yeni sədri ilə bağlı qərar verəcəyi gözlənilir.

Valyuta.az xəbər verir ki, son günlər Kevin Hassett və Kevin Warsh əsas namizədlər kimi ön plana çıxsa da, ABŞ mediası yarışa yeni bir adın qoşulduğunu yazır.

Wall Street Journalın məlumatına görə, Fed İdarə Heyətinin üzvü Christopher Waller də artıq "Fed" sədrliyi uğrunda real namizədlərdən biri hesab olunur. Bildirilir ki, indiyədək “iki Kevin”in kölgəsində qalan Waller son dövrlər Wall Street dairələrinin dəstəyini qazanıb və şansını xeyli artırıb.

Məlumata görə, Christopher Waller bu gün Donald Trampla Fed sədrliyi mövzusunda birbaşa görüş keçirəcək. Bu görüşün onun namizədliyinin taleyində mühüm rol oynaya biləcəyi qeyd olunur.

Xatırladaq ki, "JPMorgan Chase" bankının baş icraçı direktoru Jamie Dimonun dəstəyini alan Kevin Warsh da ötən həftə Tramp ilə görüşüb.

Kriptovalyutalara müsbət yanaşması ilə tanınır

Christopher Waller kriptovalyutalar və maliyyə innovasiyalarına açıq mövqeyi ilə tanınan "Fed" rəsmilərindən biridir. 

Faiz dərəcələrinin endirilməsinin tərəfdarı kimi tanınan Waller 2020-ci ildə Donald Trampın dəstəyi ilə Fed İdarə Heyətinə daxil olub.

Hassett Trampa həddindən artıq yaxındır?

ABŞ mediası eyni zamanda qeyd edir ki, Fed sədrliyi üçün ən güclü namizəd kimi göstərilən Kevin Hassett, Trampa “çox yaxın” fiqur olması səbəbilə prezidentin ətrafındakı bəzi dairələr tərəfindən ehtiyatla qarşılanır. Bu amilin onun namizədliyinə mənfi təsir göstərə biləcəyi iddia olunur.

"Fed" sədrliyi uğrunda mübarizənin yaxın günlərdə daha da kəskinləşəcəyi gözlənilir.

Sərvanə Rəmixanova