Təhsil platforması 16 milyon dollar investisiya aldı

Süni intellekt dəstəkli təhsil platforması “Oboe” 16 milyon dollar investisiya cəlb edib. Şirkətin B seriyası yatırım turuna “Andreessen Horowitz” (a16z) rəhbərlik edib.

Valyuta.az xəbər verir ki, ABŞ mərkəzli “Oboe”nin bu mərhələdəki investisiya raunduna həmçinin “Eniac”, “Haystack”, “Offline”, “Factorial” fondları, eləcə də Adam D’Anjelo, Qerri Tan, Lennı Raxitski, Mati Staniszevski, Mayki Şulman, Cerid Hext və M.Q. Siqler kimi fərdi investorlar qatılıb.

Şirkət yeni maliyyələşdirmədən qlobal miqyasda daha sürətli genişlənmək və məhsulunu daha çox istifadəçiyə çatdırmaq məqsədilə istifadə edəcəyini bildirib.

Bu il “Anchor”ın həmtəsisçiləri Nir Zixerman və Maykl Miqnano tərəfindən yaradılan “Oboe” fərdiləşdirilmiş öyrənmə təcrübəsi təqdim edir. İstifadəçi öyrənmək istədiyi mövzunu müəyyən etdikdən sonra platforma bu məqsədi analiz edir və onun üçün uyğun öyrənmə yolu formalaşdırır. Sistem mövzuları məntiqli ardıcıllıqla bölümlərə ayırır.

“Oboe” yalnız mətn məzmunu ilə kifayətlənmir. Platforma dərs izahları, açıqlamalar, nümunələr və xülasələrlə yanaşı, podkast formatında avtomatik səsləndirilmiş dərslər də yaradır. Bu səs materialları dərsin strukturuna uyğun dinamik tonla təqdim olunur. Həmçinin, kurslara viktorinalar, mini testlər və xüsusilə STEM sahələrində öyrənməni möhkəmləndirən flaşkartlar əlavə edilir. Beləliklə, platforma müəllim yanaşmasını simulyasiya edərək istifadəçiyə hərtərəfli tədris proqramı təqdim edir.

Hazırda yalnız ingilis dilində məzmun təqdim edən “Oboe”, gələcəkdə çoxdilli dəstək və mobil tətbiqlə qlobal əlçatanlığını artırmağı planlaşdırır. Platforma limitsiz kurs yaratmaq imkanı versə də, bəzi bölümlərə çıxış üçün abunəlik modelləri təklif olunur.

Mayya Hüseynova