Patent almadan ixtirasını dünyaya təqdim edən mühəndis

1959‑cu ildə "Volvo" şirkətinin mühəndisi Nils Bohlin tərəfindən icad edilən üç nöqtəli emniyyət kəməri avtomobil təhlükəsizliyi tarixində inqilabi yenilik hesab olunur. Bu sistem sürücünü və sərnişini həm çiyin, həm də bud hissədən bağlayaraq qəza zamanı bədənin avtomobil içindəki hərəkətini minimuma endirir və ölüm riskini xeyli azaldır.

Valyuta.az xəbər verir ki, bu kəmər ilk dəfə həmin il "Volvo PV544" və "Volvo Amazon" modellərində tətbiq olunub.

Lakin şirkət bu texnologiyadan kommersiya məqsədilə istifadə etmədi – əksinə, patenti bütün avtomobil sənayesi üçün açıq şəkildə istifadəyə verdi, heç bir ödəniş və ya lisenziya tələbi olmadan.

"Volvo"bu addımı ilə təhlükəsizliyi kommersiya maraqlarının fövqündə tutdu və bu qərarın nəticəsi olaraq üç nöqtəli emniyyət kəməri qısa müddətdə qlobal standartlara çevrildi.

"Volvo"nun bu sosial məsuliyyət yanaşması nəticəsində aparılan tədqiqatlara əsasən, bu ixtira indiyədək 1 milyondan çox insanın həyatını xilas edib. İxtiranın müəllifi Nils Bohlin daha öncə aviasiya təhlükəsizliyi sahəsində çalışıb və təyyarələrdə istifadə edilən katapult sistemləri üzərində ixtisaslaşıb. Bu təcrübəsi avtomobillər üçün daha effektli təhlükəsizlik mexanizmi hazırlamasına səbəb olub.

Başlanğıcda bəzi istifadəçilər bu kəməri qəribə və çətin hesab etsə də, sınaqlar sübut etdi ki, əvvəlki iki nöqtəli (yalnız bel hissəsini əhatə edən) kəmərlərlə müqayisədə, yeni sistem daha yüksək qoruma təmin edir.

Hazırda "Volvo" şirkəti bu mirası davam etdirərək sensor əsaslı, adaptiv təhlükəsizlik kəmərləri üzərində də işləyir. Bu yeni nəsil sistemlər sərnişinin bədən quruluşuna və oturuş vəziyyətinə uyğun olaraq öz gərginliyini tənzimləyə bilir.

Mayya Hüseynova