Ford 19,5 milyard dollarlıq zərərə düşəcək

Ford Motor elektrik avtomobil istehsalını məhdudlaşdırmaq qərarına gəlib. Şirkət 2025-2026-cı illərdə bu qərarın nəticəsində ümumilikdə 19,5 milyard ABŞ dolları həcmində maliyyə itkisi ilə üzləşəcəyini açıqlayıb.

Valyuta.az "Forbes"a istinadən xəbər verir ki, Ford-un bu addımı sənayedə elektrik nəqliyyat vasitələrinə olan tələbin zəifləməsi fonunda atılıb. Şirkət 2023-cü ildən bəri EV (elektrik nəqliyyat vasitələri) biznesində artıq 12 milyard dollardan çox zərərə düşüb.

Məlumata görə, zərərin əsas hissəsi 2025-ci ilin dördüncü rübü və 2026-cı ildə qeydə alınacaq, təxminən 5,5 milyard dollarlıq hissəsi isə 2027-ci ilə ötürüləcək.

Ford həmçinin F-150 modelinin elektrik versiyasının istehsalını dayandıracaq və diqqətini benzinlə işləyən və uzadılmış məsafəli hibrid modellərə yönəldəcək. Şirkət 2027-ci ilə qədər 30 min dollar dəyərində aşağıbüdcəli pikap modeli təqdim etməyi və 2030-cu ilə qədər modellərinin yarısının EV, hibrid və uzadılmış məsafəli avtomobillərdən ibarət olmasını planlaşdırır.

Qeyd edək ki, elektrik avtomobil satışlarındakı durğunluq Tesla və General Motors kimi digər nəhəng avtomobil istehsalçılarının da strategiyalarına yenidən baxmasına səbəb olub.

Tənzilə Ağabalayeva