"Digital Startup Awards 2025"-in qalibləri açıqlandı - Azərbaycan startapı da 50 min dollar investisiya aldı

Özbəkistan Rəqəmsal Texnologiyalar Nazirliyi, "IT Park Uzbekistan" və "IT Park Ventures" 12–13 dekabr tarixlərində Daşkənddə beynəlxalq "Digital Startup Awards" proqramının böyük finalını təşkil edib. Ümumi mükafat fondu 1 milyon dollar olan bu təşəbbüs Mərkəzi Avrasiya regionunun ən böyük startap tədbirlərindən biridir.

Proqramın məqsədi yüksək potensiala malik layihələri müəyyən etmək, sahibkarlığın inkişafına və regionda innovativ fəaliyyətin stimullaşdırılmasına dəstək göstərməkdir. Müsabiqəyə Ermənistan, Qazaxıstan, Qırğızıstan, Tacikistan, Azərbaycan, Gürcüstan, Türkmənistan və Monqolustandan olan startaplar dəvət olunub. Özbəkistan startapları isə "Ən yaxşı startap layihəsi" istiqamətində iştirak edib.

2025-ci ildə proqram Mərkəzi Asiya, Qafqaz və Monqolustandan olan qurucu və texnoloji komandaların böyük marağına səbəb olub. Ümumilikdə 1025 müraciət qeydə alınıb: onlardan 397-si "Ən yaxşı startap layihəsi", 268-i "İnkubasiya", 360-ı isə "Akselerasiya" istiqamətləri üzrə təqdim olunub.

Müsabiqə 1 iyul 2025-ci il tarixində elan edilib və müraciətlərin qəbulu 10 sentyabradək davam edib. "İnkubasiya" və "Akselerasiya" istiqamətlərində komandalar ilkin seçim mərhələsi və müsahibədən keçərək beynəlxalq ekspertlər və mentorlarla əməkdaşlıq imkanı əldə ediblər. Onlar üçün təlim sessiyaları, intensiv seminarlar və texnologiya komandaları, korporasiyalar və vençur fondlarla şəbəkələşmə fürsətləri yaradılıb. "Ən yaxşı startap layihəsi" istiqamətində seçim proqram iştirakçısı olan ölkələrdə təşkil edilən oflayn yarımfinallar vasitəsilə aparılıb.

Final mərhələsində üç istiqamət üzrə layihələr təqdim olunub:

— "İnkubasiya" və "Akselerasiya" üzrə 29 startap,
— "Ən yaxşı startap layihəsi" üzrə 22 startap.

Aşağıdakı layihələr investisiya qazanıb:

"AVM.AI", Qazaxıstan — 50 000 dollar
"Avto-time", Qazaxıstan — 25 000 dollar
"Clario", Qazaxıstan — 50 000 dollar
"Epsilon3.ai", Tacikistan — 25 000 dollar
"Layf", Ermənistan — 50 000 dollar
"Moon AI", Qazaxıstan — 50 000 dollar
"Oneplace.HR", Monqolustan — 50 000 dollar
"Porte Tech", Qazaxıstan — 50 000 dollar
"Recepta", Azərbaycan — 50 000 dollar
"Robospark", Qazaxıstan — 50 000 dollar
"Rosta", Qazaxıstan — 25 000 dollar
"Smarthub", Tacikistan — 50 000 dollar

Oktyabr-noyabr aylarında doqquz ölkədə oflayn yarımfinallar təşkil olunub. Finala 22 startap vəsiqə qazanıb: onlardan 18-i Mərkəzi Avrasiya ölkələrindən, 4-ü isə Özbəkistandan olub.

Müsabiqədə "EdTech", "FinTech", "E-Commerce", "GovTech", süni intellekt (AI), SaaS, davamlı inkişaf və yaradıcı sənaye sahələrini əhatə edən layihələr yer alıb. İştirakçılar arasında təhsil və səhiyyənin rəqəmsallaşdırılması, ticarət və logistikanın səmərəliliyinin artırılması, analitika və süni intellekt alətləri üzrə platformalar olub. Münsiflər heyətinə Misir, Koreya, Oman, ABŞ və Çexiyadan olan beynəlxalq vençur fondları və akseleratorların nümayəndələri daxil edilib.

"Digital Startup Awards 2025" müsabiqəsinin qalibləri:

Birinci yer — 40 000 dollar — "Multicode", Qazaxıstan
Süni intellekt əsaslı yük vaqonlarının operatorları üçün SaaS platforması. Əməliyyat proseslərini optimallaşdırmağa kömək edir. Təsisçi — Anuar Sarsembinov.
İkinci yer — 25 000 dollar — "HGT", Özbəkistan
Kommunal xidmətlərin rəqəmsallaşdırılması sahəsində fəaliyyət göstərən startap. Təhlükəsiz və rahat ödəniş sistemi yaradır. Təsisçi — Alişer Todjiyev.
Üçüncü yer — 15 000 dollar — "Telagri", Gürcüstan
Kənd təsərrüfatı kreditləşməsində riskləri azaldan "FinTech" platforması. Fermer təsərrüfatlarının məlumatlarını maliyyə göstəricilərinə çevirərək banklara riskləri idarə etməkdə, fermerlərə isə məhsuldarlığı artırmaqda kömək edir. Təsisçi — İrakli Çikava.
Ən yaxşı qadın startapı — 10 000 dollar — "MamaSpace", Qırğızıstan
Süni intellekt və ekspert dəstəyi ilə anaların sağlamlığına yönəlmiş platforma. Etibarlı tövsiyələr verir və analara özlərinə və övladlarına qulluq etməkdə yardımçı olur. Təsisçi — Gulnaza Xalmambetova.