“Black Friday” endirimlərinə niyə tez başlayırıq?

Son illərdə “Black Friday” endirimləri elə bir mərhələyə çatıb ki, artıq bu kampaniyalar “bir gün” deyil, demək olar ki, “bir ay” kimi keçirilir. “Black Friday” endirimlərinin mağazalarda tez başlamasının və belə uzun müddət davam etməsi nə dərəcədə doğrudur?

Marketinq üzrə ekspert Samir Mehdiyev Valyuta.az-a bildirir ki, brendlərin bu kampaniyalara erkən başlamasının əsas məqsədi rəqabətdə üstünlük qazanmaq və satışları uzun müddət canlı saxlamaqdır: “Mağazalar və brendlər alıcıların diqqətini tez cəlb etmək və onları uzunmüddətli şəkildə alış prosesində saxlamaq üçün “Black Friday”i əvvəlcədən başlayırlar. Bu, tamamilə planlı marketinq strategiyasıdır”.

S.Mehdiyevin sözlərinə görə, bu dövrdə real fürsətlər də az deyil. Xüsusən də böyük brendlər və texnoloji məhsullar üzrə bəzi endirimlər doğrudan da sərfəli olur. Lakin çox vaxt bu kampaniyalar sadəcə “endirim ab-havası” yaratmaq məqsədi daşıyır: “Bəzi hallarda qiymətlər əvvəlcədən bir qədər artırılır, sonra “böyük endirim” kimi təqdim olunur. Bu zaman istehlakçı real mənada çox qazanmış olmur, sadəcə endirim ab-havasına qapılır”.

Ekspert hesab edir ki, uzunmüddətli kampaniyalar artıq “Black Friday”in öz dəyərini müəyyən qədər itirir:

“Əvvəllər insanlar bir gün üçün xüsusi fürsət gözləyirdilər, indi isə bu təəssürat itib. Belə olan halda endirimlər artıq unikal fürsət deyil, sadəcə növbəti satış aksiyası kimi görünür. Bu tendensiya alıcı davranışlarını da dəyişib. İnsanlar artıq endirimləri ehtiyac kimi yox, bir növ “alış-veriş ənənəsi” kimi qəbul edirlər. Bəzən heç real ehtiyac olmadığı halda, sadəcə fürsəti qaçırmamaq üçün alış-veriş edirlər. Bu da istehlak davranışlarında emosional alış tendensiyasını gücləndirir.”

Ekspertin fikrincə, bu cür erkən başlayan və uzun müddət davam edən endirimlər markalar üçün həm üstünlük, həm də risk yaradır: “Uzunmüddətli endirimlər diqqəti cəlb etsə də, həddindən artıq uzandıqda, istehlakçının marağını azalda bilər. Bundan başqa, bəzi brendlər üçün bu, “ucuzlaşma imici” formalaşdıra və uzunmüddətli etibara mənfi təsir göstərə bilər. “Black Friday”in əsas ideyası – bir günlük böyük fürsət yaratmaq konsepsiyası – artıq dəyişib. İndi bu, daha çox satış dövrü, emosional alış-veriş dalğası və brendlər arasında rəqabət mübarizəsi formasını alıb” – deyə ekspert qeyd etdi.

Tənzilə Ağabalayeva