Bayramda kiçik bizneslər üçün böyük fürsətlər var - Forbes

Bayram mövsümü kiçik biznes sahibləri üçün təkcə qısamüddətli satış artımı deyil, həm də uzunmüddətli müştəri qazanmaq baxımından mühüm fürsətdir. Araşdırmalar göstərir ki, bayram dövründə qazanılan müştərilərin böyük hissəsi sonradan da eyni biznesə geri qayıdır.

“Forbes”in məlumatına görə, müştərilərin 72 faizi hər bayram mövsümündə eyni kiçik bizneslərdən alış-veriş edir, 88 faizi isə ilk bayram alışından sonra yenidən məhsul və ya xidmət almağa meyilli olur. Buna baxmayaraq, 10 nəfərdən az işçisi olan kiçik bizneslər daha böyük şirkətlərlə müqayisədə bayram üçün xüsusi hazırlıq görməyə və ya kampaniyalar təklif etməyə daha az diqqət ayırır.

Bu nəticələr ABŞ, Kanada, Böyük Britaniya, Avstraliya və Yeni Zelandiyada minlərlə biznes sahibi və istehlakçı arasında aparılmış Small Business Now hesabatına əsaslanır. Noyabr ayı Kiçik Biznes Ayı hesab olunur və ilin son rübündə 10 gün qaldığı üçün, Black Friday fürsətini qaçıran bizneslər belə ilin sonuna qədər satışlarını artırmaq şansına malikdir.

Gəlir yaratmağa fokuslanın

Araşdırmaya əsasən, kiçik bizneslərin 60 faizi illik gəlirinin yarısına qədərini məhz dördüncü rübdə əldə edir. Bu dövrdə əsas diqqəti gəlir gətirən fəaliyyətlərə yönəltmək vacibdir. Gözləyə biləcək inzibati və texniki işlər diqqəti yayındırmamalıdır.

İlin son rübü riskli görünsə də, eyni zamanda böyük fürsətlər yaradır. Müştərilər bu dövrdə daha çox xərcləyir və biznes sahibləri planlaşdırma, sənədləşmə kimi məsələləri kənara qoyaraq satış və gəlirə fokuslanmalıdır.

Mövsümi endirim və kampaniyaları önə çıxarın

Müştəriləri alışa təşviq edən ən effektiv üsullardan biri endirim və kampaniyalardır. Sorğuda iştirak edən biznes sahiblərinin 51 faizi endirimlərin ən təsirli satış aləti olduğunu bildirib.

İlin sonuna az vaxt qaldığı üçün sıfırdan yeni məhsul və ya xidmət yaratmaq əvəzinə, artıq mövcud olan imkanlardan istifadə etmək daha məqsədəuyğundur. Təlim, məsləhət və bilik xidmətləri göstərənlər əvvəlki proqramlarını yenidən təqdim edə, məhsul satanlar isə mövcud anbar ehtiyatlarını satışa çıxara bilərlər.

Burada əsas məsələ qiymətləri həddindən artıq aşağı salmamaqdır. Mənfəət marjası az olan bizneslər üçün məhsulları paket şəklində təklif etmək və ya əlavə, az xərc tələb edən bonuslar vermək daha səmərəli ola bilər. Məsələn, xidmət sahəsində çalışanlar müştərilərə əlavə konsultasiya, qısa təlim və ya gələcək tədbirə pulsuz giriş imkanı yarada bilərlər. 

Marketinqdə sosial mediaya üstünlük verin

Araşdırma göstərir ki, bayram dövründə sosial media marketinqi email marketinqindən daha təsirlidir. Respondentlərin 40 faizi sosial medianı ən effektiv kanal hesab etdiyi halda, email marketinqi cəmi 18 faiz səviyyəsində qalır.

Bununla belə, hər biznes üçün ən doğru kanal fərqli ola bilər. Ona görə də sahibkarlar öz satış statistikalarını analiz etməli, müştərilərin haradan gəldiyini müəyyən etməlidir. Əgər email satış gətirirsə, ona fokuslanmaq, tövsiyə sistemi işləyirsə, bonuslu referal kampaniyaları tətbiq etmək daha məqsədəuyğundur.

Ən əsası isə müştərilərin aktiv olduğu platformanı seçməkdir. Bilik və məsləhət yönümlü bizneslər üçün LinkedIn, vizual və dizayn əsaslı işlər üçün isə Instagram daha effektiv nəticə verə bilər. Sosial mediada olmaq hər platformada aktiv olmaq demək deyil.

Nəzarət edə bildiyiniz məsələlərə fokuslanın

İlin sonuna yaxın bazar vəziyyəti, inflyasiya və alıcılıq qabiliyyəti bir çox biznes sahibini narahat edir. Hesabata əsasən, sahibkarların 32 faizi inflyasiyanı, 22 faizi isə müştəri xərclərinin azalmasını əsas problem kimi görür.

Bundan əlavə, bir çox biznes tarif siyasətlərindən də mənfi təsirləndiyini bildirir.

Bu problemlər real olsa da, sahibkarlar əsas diqqəti öz nəzarət edə bildiyi addımlara yönəltməlidir. Qanunvericilik və bazar şərtləri dəyişkən ola bilər, lakin satış strategiyası, kampaniya planı və müştəri ilə ünsiyyət sahibkarın öz əlindədir. Ən önəmlisi isə gəliriniz üçün süni məhdudiyyətlər qoymamaq və fürsətləri düzgün dəyərləndirməkdir.

 Şəbnəm İbrahimxəlil