2026-cı il tətilləri üçün Avropanın ən az qiymətləndirilmiş 5 şəhəri açıqlandı

Turistlər Barcelona kimi ən sıx ziyarət edilən şəhərlərdən qaçmaq üçün daha az tanınan, amma maraqlı yerlər axtarırlar.

Valyuta.az xəbər verir ki, "Travel Off Path" nəşrinin ekspertləri 2026-cı ildə diqqət yetirilməsi tövsiyə olunan Avropanın beş az qiymətləndirilmiş şəhərini seçiblər.

1. Trondheim, Norveç - Ekspertlər Oslo və Bergen kimi populyar şəhərlər əvəzinə turistlərə Trondheimı tövsiyə edirlər. Burada məşhur katedral, yaxşı qorunmuş şəhər mərkəzi və qeyri-adi muzeylər var. Nidaros katedralinin tarixi 1000 ildən çoxdur və o, dünyanın ən şimal orta əsr kilsəsi və bəlkə də Norveçin ən gözəl qotik binasıdır. Katedral Bakklandet məhəlləsinin mərkəzində yerləşir – rəngli taxta evlər və daş döşəməli küçələrlə əhatə olunmuş bir bölgə. Eyni zamanda, Nidelva çayının sahilində çoxsaylı gözəl kafelər yerləşir.

2. Nafplion, Yunanıstan - Peloponnes liman şəhəri Nafplion, Atinadan əvvəl Yunanıstanın paytaxtı olub və hələ də öz prestijini qoruyub saxlayır. Şəhərdə möhtəşəm meydanlar, canlı ticarət küçələri, monumental pravoslav kilsələri və Venesiya dövrünə aid möhtəşəm qalalar var. Tarixi mərkəz dar küçələri, neoklassik binaları və rahat kafeləri ilə şəhərin ən gözəl hissəsidir. Buradan Arvanitiy sahilinə çıxmaq olar – burada ailəvi yunan tavernaları evdə hazırlanmış sığlino (duzlanmış donuz əti) və münasib qiymətə şərab təqdim edir. Tarixi sevənlər isə 85 metr yüksəklikdə yerləşən Akronavplia qalasını və limanın yaxınlığındakı XV əsr Burdži qalasını ziyarət etməlidirlər.

3. Vic, İspaniya - Turizm mütəxəssisləri bildirirlər ki, hər il on milyonlarla turist Barselonaya üz tutur, ətraf Kataloniya regionuna isə diqqət yetirmir. Nəticədə, Vic kimi kiçik şəhərlərdə demək olar ki, heç bir turist sıxlığı yoxdur. Vicin köhnə şəhəri kartpostal kimi görünür, arkaik meydanlar və gotik memarlıq ilə zəngindir. Əsas görməli yerlərə Plasa-Mayor meydanı, II əsrdə tikilmiş Vic Roman məbədi və İspaniyanın ən yaxşı romanik və gotik sənət muzeylərindən biri olan Episkopal Muzey daxildir.

4. Quimper, Fransa - Bu şəhər Bretaninin – Fransanın kelt ürəyinin – əsas mədəni mərkəzlərindən biridir. Şəhər orta əsr divarlarla əhatə olunub və burada yerləşən möhtəşəm Sen-Koranten katedrali Parisdəki Notre-Dame ilə rəqabət apara bilər. Turistlərə Vye-Quimper – şəhərin ən qədim hissəsi – dar piyadalar küçələri və qədim fexverklə tikilmiş evləri ilə gəzmək tövsiyə olunur. Qastronomlar isə Odet çayı sahilində yerləşən Lokmaria rayonunda müxtəlif bistrolar və krep restoranlarını kəşf edə bilərlər.

5. Trençin, Slovakiya - Təxminən 55 000 əhalisi olan bu Avropa şəhəri hələ də orta əsr romantikası və cəngavər dövrünün atmosferini qoruyur. Şəhərin köhnə hissəsi bəzəkli evlərlə əhatə olunmuş daş döşəməli küçələr labirintidir. Şəhəri izləyən qayada Trençin qalası yerləşir – möhtəşəm qalaqüllələr, gözəl həyətlər və gizli keçidlər turistləri gözləyir. Qeyd edək ki, şəhər 2026-cı il üçün Avropanın mədəni paytaxtı elan edilib və il boyunca burada bir çox mədəni tədbirlər keçiriləcək.

Paşa Məmmədli