2025-ci ildə investorların hədəflədiyi 5 kvant səhmi - SƏHƏR OXUSU

Son bir ildə süni intellekt ("AI") texnologiyalarındakı yeniliklər diqqət mərkəzində olsa da, təcrübəli hedc-fond meneceri Devid Kass (David Kass) proqnoz edir ki, "AI" yaxın zamanda yerini kvant hesablamasına verəcək. Bu texnologiya, onun fikrincə, yeni texnoloji inqilabın əsasını təşkil edəcək.  

Kvant hesablaması texnologiya sahəsində sürətlə inkişaf edir və artıq şirkətlər bu texnologiyanın hesablama gücünü artırmaq qabiliyyətini qiymətləndirməyə başlayıblar. Bu inkişaf, gündəlik həyatımıza və iş metodlarımıza əhəmiyyətli təsir edə bilər.  

Bu texnologiya kvant mexanikasının prinsiplərinə əsaslanan yüksək səviyyəli bir hesablama növüdür və 2025-ci ildə texnologiya sektorunda yeni bir "qızıl dövr" yarada bilər.  

Kvant hesablaması nədir?  

Kvant hesablaması, adi kompüterlərdən fərqli olaraq, tapşırıqları daha sürətli şəkildə yerinə yetirən, mürəkkəb problemləri eyni anda həll edə bilən bir hesablama növüdür.  

"TheStreet" yazır: "Bu sistemlər kvant bitlərindən (qubitlərdən) istifadə edərək kvant mexanikasının prinsiplərinə əsaslanır və ənənəvi kompüterlərdən daha yüksək sürətlə mürəkkəb problemləri həll edir."  

"AI" sahəsində irəliləyişlər üçün inkişaf etmiş hesablama gücünə ehtiyac artdıqca, kvant hesablaması sahəsində fəaliyyət göstərən şirkətlər bu tələbi qarşılamaq potensialına malikdir. Mütəxəssislər bu sahədə bir neçə şirkətin böyük inkişaf perspektivləri olduğunu düşünürlər.  

Mütəxəssislərin tövsiyə etdiyi 5 kvant hesablaması səhmi:

1. "Quantum Computing" ("QUBT") 

"Quantum Computing", adını fəaliyyət göstərdiyi sahədən götürən bir şirkətdir və 2024-cü ildə böyük uğur qazanıb. Şirkətin səhmləri ilin əvvəlində $1-dən aşağı dəyərdə olmasına baxmayaraq, ilin sonunda $18-ni keçərək təxminən 2,000% artış göstərib.  

Təcrübəli Wall Street treyderi Stiven Guilfoyl (Stephen Guilfoyle) qeyd edir ki, "Quantum Computing"in gəlirləri 2025-ci ildə 200% artacaq. Bununla belə, şirkət hələ mənfəət gətirmir və gələcəkdə mənfəətli olma müddətini təxmin etmək çətindir.  

2. "D-Wave Quantum Systems" ("QBTS")

"D-Wave", 2024-cü ildə 1,000%-dən çox artış göstərən başqa bir şirkətdir. Şirkətin gəlirləri üçün 2025-ci ildə 15 milyon dollara çatacağı və bunun ötən illə müqayisədə 64% artım demək olduğu proqnozlaşdırılır. Analitiklər bu səhmləri yüksək dəyərləndirirlər.  

3. "IonQ" ("IONQ")
 
"IonQ" həm kvant aparatları, həm də proqram təminatı istehsalçısı kimi tanınır. Şirkət 2024-cü ildə 250% artış göstərib. Analitiklər 2025-ci il üçün gəlirin təxminən 100% artaraq 85 milyon dollara çatacağını proqnozlaşdırırlar. Şirkət "Amazon Web Services" ("AWS") və ABŞ Hərbi Hava Qüvvələri Tədqiqat Laboratoriyası ilə əməkdaşlıq edir.  

4. "Rigetti Computing" ("RGTI")  

"Rigetti Computing", kvant inteqrasiya olunmuş dövrələr istehsal edir və 2024-cü ildə 1,900%-dən çox artış göstərib. Şirkət klassik və kvant texnologiyalarını birləşdirən həllər təklif edir.  

5. "Alphabet" ("GOOGL")  

"Google"un ana şirkəti "Alphabet", kvant hesablamasına birbaşa fokuslanmasa da, "Willow" adlı qabaqcıl kvant çipi ilə texnologiya sahəsində əhəmiyyətli addımlar atıb. Bu çip tibbdən riyaziyyata qədər müxtəlif sahələrdə inqilabi dəyişikliklərə səbəb ola bilər.  

Risklər
 
Bu səhmlərin yüksək artışına baxmayaraq, ehtiyatlı olmaq vacibdir. "Quantum Computing" və "D-Wave" kimi şirkətlər hələ inkişaf mərhələsindədir və mənfəət gətirmir. Buna görə də, bu cür səhmlərin dəyərləndirilməsi çətin ola bilər.  

Mütəxəssislər bildirirlər ki, kvant hesablaması sahəsində qalibləri müəyyən etmək üçün bir neçə il gözləmək lazım gələcək.  

Rəhim / Valyuta.Az / SƏHƏR OXUSU