1 milyard avroya yaxın saxta pul aşkarlandı

Rumıniyada 1 milyard avroya yaxın saxta pul aşkarlanıb.

Valyuta.az xəbər verir ki, Rumıniyanın cənub-şərqində yerləşən Konstansa limanında dəyəri təxminən 1 milyard avro olan saxta əskinaslar aşkarlanıb. Bu barədə Rumıniya hüquq-mühafizə orqanları məlumat yayıb.

Məlumata görə, Rumıniya polisi limanda 160 qutuda saxta pul tapıb. Araşdırma Europol tərəfindən koordinasiya olunan “Decoy III” əməliyyatı çərçivəsində aparılıb. Əməliyyatın məqsədi Çin və Türkiyə kimi ölkələrdən Avropa İttifaqına daşınan saxta valyuta yüklərini aşkar etmək olub.

Rəsmilərin bildirdiyinə görə, 40 bağlamada 1,2 milyon ədəd 500 avroluq (cəmi 600 milyon avro), 20 bağlamada isə 600 min ədəd 200 avroluq (cəmi 120 milyon avro) saxta əskinas olub. Bundan əlavə, 60 bağlamada 1,8 milyon ədəd 100 avroluq (180 milyon avro) və 40 bağlamada 1,2 milyon ədəd 50 avroluq (60 milyon avro) əskinaslar aşkarlanıb.

Ümumilikdə 4,8 milyon saxta banknot - 960 milyon avro məbləğində vəsait müsadirə edilib. Faktla bağlı istintaq davam etdirilir.

Sərvanə Rəmixanova