Aİ X sosial şəbəkəsi ilə bağlı araşdırmanı dayandırdı

Avropa İttifaqı ABŞ-la ticarət danışıqlarına görə X sosial şəbəkəsi ilə bağlı araşdırmalarından birini dayandırıb. 

Valyuta.az xəbər verir ki, bu barədə “Financial Times” mənbələrə istinadən məlumat yayıb. 

Avropa Komissiyasının araşdırmaları Aİ-nin rəqəmsal şəffaflıq qaydalarının pozulması ilə bağlı idi.

Adı açıqlanmayan rəsmilərin sözlərinə görə, Avropa Komissiyası təhqiqatı razılaşdırılmış vaxt çərçivəsində başa çatdıra bilməyib. İndi Brüssel Aİ-ABŞ danışıqları ilə bağlı vəziyyət aydınlaşdıqdan sonra sosial şəbəkədə qərar verəcək. Nəşrin mənbələri izah edib ki, Aİ-də heç kim prezident Donald Trampı incitmək və ya ticarət münaqişəsini gərginləşdirmək istəmir.

Aİ X ilə bağlı bir sıra araşdırmalar aparır. Brüssel və Vaşinqton arasında mübahisə predmeti Avropa Rəqəmsal Xidmətlər Aktıdır. ABŞ-ın iri texnoloji şirkətləri qaydaların söz azadlığı prinsiplərini pozduğuna inanırlar.

Avropa Komissiyasının sədri Ursula fon der Leyen Brüsselin qanunvericiliyə dəyişiklik etməyəcəyini bəyan edib. Aprel ayında Aİ “Apple” və “Meta” şirkətlərini antiinhisar qaydalarını pozduğuna görə ümumilikdə 700 milyon avro məbləğində cərimələyib.

Donald Tramp avqustun 1-dən Avropa İttifaqından gələn mallara 30% rüsum tətbiq ediləcəyini açıqlayıb. Avropa Komissiyası cavab olaraq Aİ ölkələrinə cavab rüsumlarının tətbiqi üçün Amerika mallarının siyahısını təqdim edib. AK izah edib ki, Vaşinqtonla ticarət danışıqları nəticə verməsə, bu tədbirlər görüləcək.

Paşa Məmmədli