Süni intellektlə yaradılmış video oyunların sayı 8 dəfə artıb

2025-ci il ərzində süni intellekt (Al) vasitəsilə yaradılan videooyunların sayı kəskin şəkildə artıb. 

Valyuta.az xəbər verir ki, "Totally Human Media" şirkətinin analitiki İçiro Lambenin bloquna əsasən, bir il öncə "Steam" platformasında təxminən 1000 oyunda İİ texnologiyasının tətbiqi qeyd olunurdusa, bu il bu rəqəm 8000-ə yaxınlaşır. Bu da 2025-ci ildə yayımlanan hər beş oyundan birinin birbaşa və ya dolayı şəkildə süni intellektlə hazırlandığını göstərir.

Məlumata görə, oyun inkişafında Al texnologiyası əsasən vizual komponentlərin yaradılmasında – təxminən 60% hallarda – istifadə olunur. Bu, personajların dizaynı, fonlar, teksturalar və 3D modellərin generasiyasını əhatə edir.

Bundan başqa, Al aşağıdakı sahələrdə də geniş tətbiq edilir:

* oyun içi musiqi və səsləndirmələrin generasiyası
* hekayə və mətn yazılışı (oyun loru və dialoqlar)
* marketinq materiallarının hazırlanması

Süni intellekt təkcə texniki sahələrdə deyil, birbaşa oyun mexanikasında da getdikcə daha çox yer tutur. Məsələn:

* roguelike janrında olan bəzi oyunlarda İİ real vaxtda səhnələr və əşyalar yaradır
* inZOI kimi oyunlarda isə oyunçular sadəcə mətn sorğusu ilə obyektlər üçün teksturalar generasiya edə bilirlər

Al artıq təkcə kiçik müstəqil (indie) studiyaların deyil, iri büdcəli layihələrin də ayrılmaz hissəsinə çevrilib. Məsələn:

* The Finals adlı populyar şuter oyununda personajların səsləri neyroşəbəkə vasitəsilə yaradılıb
* Lethal Company adlı qorxu janrında olan oyunda isə bəzi oyun içi rəsmlər İİ ilə generasiya olunub

Paşa Məmmədli