"Microsoft" 200 nəfəri işdən çıxardı, işlərini süni intellektə həvalə etdi

Oyun sənayesi süni intellekt səbəbilə ciddi bir böhranla üz-üzə qala bilər. Bu böhranın ilk əlamətlərindən biri kimi "Microsoft" şirkətinin 200 oyun inkişaf etdiricisini işdən çıxarması göstərilir. Artıq bu şəxslərin yerinə onların da hazırlanmasına töhfə verdiyi süni intellekt sistemləri işə başlayır.

Valyuta.az xəbər verir ki, "Microsoft", "Candy Crush" oyununun istehsalçısı olan "King" studiyasında çalışan təxminən 200 nəfəri işdən çıxarıb. Qeyd olunan maraqlı məqam isə bu işçilərin bir vaxtlar üzərində işlədikləri süni intellekt alətlərinin, indi onların yerini tutmasıdır.

Hal-hazırda birbaşa kodlaşdırma ilə məşğul olan proqramçılar deyil, əsasən qrafik dizaynerlər, səviyyə dizaynerləri, istifadəçi təcrübəsi və istifadəçi araşdırmaları sahəsində çalışan komandalar işdən çıxarılıb. Bu bölmələrə isə artıq süni intellekt sistemləri inteqrasiya olunur.

Şirkət daxilindən sızan məlumatlara görə, süni intellekt səviyyələrin çətinlik dərəcəsini insanlardan daha effektiv şəkildə tənzimləyə bilir. Bu da komandaların daha çox sayda və daha dərindən səviyyə testi aparmasına imkan yaradır. Beləliklə, səviyyə dizaynı ilə məşğul olan insan resurslarına ehtiyac qalmadığı qənaətinə gəlinib.

Son dövrdə baş verən işdən çıxarmalar "Microsoft"un oyun bölməsində yaxın zamanlarda daha ciddi hiss oluna bilər. Yenə də şirkət daxilindən əldə olunan məlumatlara əsasən, "Halo Studios"da çalışan ən azı beş nəfər də işdən çıxarılıb. Bu isə "Microsoft Oyun" bölməsinin rəhbəri Fil Spenserin "Xbox"un mövcud gəlirliliyini təqdir edən daxili məktubundan dərhal sonra baş verib.

Yəni "Microsoft" yüksək gəlir əldə etməsinə baxmayaraq, əvəzləyə bildiyi insanları süni intellektlə əvəz etməyə başlayıb. Əgər bu meyil oyun sektoru ilə məhdudlaşmayaraq digər iqtisadi sahələrə də yayılarsa, süni intellektin geniş kütlələri işsiz qoyması səbəbilə küçə etirazlarının başlaması və insanların süni intellektin istifadəsini məhdudlaşdıran qanunlar tələb etməsi ehtimalı da yüksək görünür.

Paşa Məmmədli