Yaddaş böhranı prosessorlara da çatdı

Video kartlar, RAM, SSD və soyutma sistemlərindən sonra süni intellektin sürətli inkişafı prosessor seqmentinə də təsir göstərməyə başlayıb, hələlik yalnız server prosessorları üzrə. 

Valyuta.az "Reuters"ə istinadən xəbər verir ki, AMD və "Intel" müştərilərini yeni partiyaların gecikməsi barədə məlumatlandırıb.

Məsələn, ümumi Intel gəlirlərinin 20%-dən çoxunun düşdüyü Çin bazarında "Xeon" prosessorlarına güclü çatışmazlıq müşahidə olunur – onların qiyməti 10% artıb və almaq üçün gözləmə siyahısına yazılmaq lazımdır. Bəzi hallarda çatdırılma müddəti altı aya qədər uzanır.

"Intel" etiraf edib ki, süni intellektin sürətli tətbiqi rekord tələbat yaradıb. Şirkət istəsə də, istehsal gücünü artırmaq imkanları hələ çatmır. Lakin aktiv tədbirlər görülür və çatdırılma vəziyyətinin 2026-cı ilin ikinci rübündə yaxşılaşması gözlənilir.

AMD də bəzi məhsullar üzrə çatdırılma məhdudiyyətləri barədə müştəriləri xəbərdar edib – sifarişlərin icra müddəti 8-10 həftəyə qədər artıb. Şirkət TSMC-dən daha çox prosessor ala bilmir, çünki TSMC fabrikləri "Nvidia" və digər prioritet müştərilərin sifarişləri ilə doludur.

Ekspertlər bildirirlər ki, bu vəziyyət zamanla istehlakçı seqmentinə də təsir edə bilər. Server və adi prosessorlar arasında fərqlər olsa da, tədarük zəncirləri bir-birinə bağlıdır və tələbatın artması masaüstü prosessorların qiymətinin yüksəlməsinə səbəb ola bilər.

Əvvəlki məlumatlara görə, 2026-cı ildə "Nvidia" 30 il ərzində ilk dəfə yeni video kart buraxmayacaq. Həmçinin şirkət RTX 50xx istehsalını azaltmaq və növbəti oyun GPU nəsilini təxirə salmaq niyyətindədir.

Eyni zamanda KİV bildirir ki, AMD video kartları artıq ilin əvvəlindən ikinci dəfə qiymət artımı yaşayacaq. Yanvar ayında "Radeon RX 9000" modellərinin qiyməti təxminən 5-10% yüksəlmişdi.

Paşa Məmmədli