"Sequoia" tərəfdaşları hansı startaplara "bəli" deyiləcəyinə necə qərar verdiklərini açıqlayıblar

"Sequoia Capital"ın tərəfdaşları bildiriblər ki, startaplara investisiya qərarlarında razılıqdan çox inam ön planda tutulur. Onların sözlərinə görə, şirkət tərəfdaşlar arasında fikir ayrılığını belə qiymətləndirə bilən səsvermə sistemindən istifadə edir və yüksək fərqlilik inamın göstəricisidir.

"Jack Altman" podkastının çərşənbə axşamı yayımlanan buraxılışında "Sequoia" tərəfdaşları Alfred Lin və Pat Qreydi komandanın hansı startaplara sərmayə yatırmaq qərarına gəldiyini izah ediblər.

Qreydi deyib ki, “Artıq on ildən çoxdur ki, hər investisiya üzrə hər kəsin verdiyi səsləri qeydə alırıq. Daxili məlumatlar göstərir ki, razılaşdırılmış və ya razılaşdırılmamış fikir olması fərq etmir. Əsas olan inamın mövcudluğudur.”

"Sequoia Capital" Menlo Parkda yerləşən tanınmış vençur kapital firmasıdır və bu günə qədər "Apple", "Nvidia", "Reddit" və "SpaceX" kimi şirkətlərə sərmayə yatırıb. Son dövrlərdə isə "Kalshi" adlı proqnoz bazarları şirkətinə və hüquq texnologiyaları üzrə fəaliyyət göstərən "Harvey" startapına yatırım edilib.

Qreydi, firmada təxminən 19 ildir çalışdığını bildirərək deyib ki, hər hansı startap üçün qərar verilməzdən əvvəl komanda üzvləri 1-dən 10-a qədər bal verir. 6 və yuxarı ballar "müsbət", 4 və daha aşağı ballar isə "mənfi" sayılır.

Əlavə edib: “Əgər hər kəs 6 bal verirsə, yəqin ki, bu investisiya edilməməlidir. Bu razılaşmadır, amma heç kimin inamı yoxdur. Əgər üç nəfər 9, üç nəfər isə 1 bal veribsə, bu, investisiyanın edilməli olduğuna dair güclü bir siqnaldır. Çünki 9 balların mövcudluğu 1 ballardan daha güclü siqnaldır.”

Alfred Lin isə firmada 2010-cu ildən çalışdığını qeyd edərək əlavə edib ki, bu yanaşma risk almağa əsaslanan iş modelləri ilə uzlaşır:

“Bizə dəyişkənlik lazımdır, çünki həqiqət, hamının razı qaldığı ortada deyil,” – deyə o bildirib.

Tərəfdaşlar əlavə ediblər ki, "Sequoia"da gənc investorlar – adətən təhsildə yüksək nəticələr göstərmiş şəxslər – risk almağı öyrənməlidirlər.

Qreydi deyib ki, “Komandamıza qoşulan bir çox insanın uğursuzluq təcrübəsi az olur və biz onların bununla barışmasına kömək etməliyik. Əks halda, fərqlənən qələbələr əldə edə bilməyəcəyik.”

Tənzilə Ağabalyeva