“Parloa” 350 milyon dollar investisiya aldı

Almaniya mərkəzli “Parloa” şirkəti D seriyası investisiya raundunda 350 milyon dollar cəlb edib. 

Valyuta.az xəbər verir ki, 2018-ci ildə təsis olunan “Parloa” bu günədək ümumilikdə 560 milyon dollardan çox investisiya əldə edib. Şirkət hazırda 3 milyard dollar dəyərində qiymətləndirilir.

“Parloa” müştəri təcrübəsi sahəsində yapay zəka dəstəkli həllər təqdim edir. Şirkət yeni investisiyanı qlobal miqyasda genişlənməni sürətləndirmək və AI Agent Management Platform (AMP) adlanan idarəetmə sistemini inkişaf etdirmək məqsədilə istifadə edəcəyini bildirib.

Malte Kozub və Ştefan Ostvald tərəfindən yaradılan “Parloa” iri korporativ müştərilər üçün fərdiləşdirilmiş və təbii ünsiyyət imkanları təqdim edən rəqəmsal müştəri nümayəndələri yaratmağa fokuslanır. AMP texnologiyası texniki bilik tələb etmədən bu agentlərin yaradılmasına, idarə olunmasına və performansının real vaxt rejimində izlənilməsinə imkan verir.

“Parloa”nın agentləri müxtəlif dillərdə və mədəni kontekstlərdə fəaliyyət göstərə bilir. Bu sistemlər klassik çatbotlardan fərqli olaraq mürəkkəb istifadəçi sorğularını anlayıb cavablandırmaq və özünü inkişaf etdirmək bacarığı ilə seçilir.

Şirkət “Allianz”, “Booking.com” və “SAP” kimi beynəlxalq brendlərlə əməkdaşlıq edərək maliyyə, sığorta, elektron ticarət, səhiyyə və texnologiya sahələrində müştəri xidmətlərinin rəqəmsallaşdırılmasına töhfə verir.

“Parloa”nın əsas hədəfi yapay zəkanın yalnız avtomatik cavablandırma ilə məhdudlaşmayan, uzunmüddətli və mənalı müştəri münasibətləri qurmaq potensialından istifadə etməkdir. Şirkət bu məqsədlə xüsusilə ABŞ və Avropa bazarlarında genişlənməyə hazırlaşır.

Mayya Hüseynova