Milyonlarla dollara alındı: Tarixin ən bahalı domen adı indi bu oldu

Kripto valyuta dünyasının tanınmış simalarından biri olan Kris Marszalek bu dəfə diqqətini süni intellektə (Al) yönəldib. 

Valyuta.az xəbər verir ki, Crypto.com-un təsisçisi və baş direktoru olan Kris Marszalek yeni qurduğu AI platforması üçün böyük bir sərmayə qoyub. Şirkət AI.com domenini satın almaq üçün tam 70 milyon dollar xərcləyib.

Əgər bu rəqəm təsdiqlənsə, texnologiya tarixində ən yüksək qiymətli domen adı satışı kimi qeydə düşəcək. Daha əvvəl “Cars.com” kimi platformalar üçün daha yüksək qiymətlər danışılmış olsa da, AI.com-un nağd ödənişi sektorda bütün balansları dəyişdirir.

Marszalekin vizyonu, adi ChatGPT tipli söhbət botlarından xeyli irəli getməyi hədəfləyir. AI.com markası altında yaradılacaq platforma, istifadəçilərə həqiqətən “iş görən” şəxsi köməkçilər təqdim edəcək. Bu rəqəmsal köməkçilər borsa əməliyyatlarını idarə etməkdən mesaj göndərməyə, mürəkkəb layihələr yaratmaqdan sosial tətbiqlərdə profilinizi yeniləməyə qədər geniş fəaliyyət sahəsini əhatə edəcək.

İşin ən diqqətçəkici tərəfi təhlükəsizlikdir. Şirkət bildirir ki, hər istifadəçinin köməkçisi tamamilə fərdi və şifrəli mühitdə işləyəcək. Məlumatlar yalnız istifadəçiyə aid xüsusi açarlarla qorunacaq. Marszalek qeyd edir ki, sadə söhbət mərhələsindən, insanların yerinə əməliyyatlar həyata keçirən süni intellekt agentləri dövrünə keçmişik.

Marszalek həm Crypto.com, həm də yeni AI.com layihəsinin baş direktoru olaraq fəaliyyətini davam etdirəcək. Xatırladaq ki, Crypto.com vaxtilə "Staples Center"in adını 700 milyon dollara dəyişmək kimi böyük marketinq addımları ilə diqqət çəkmişdi. İndi oxşar bir nümayiş süni intellekt dünyası üçün planlaşdırılır. Hazırda saytda geri sayım göstəricisi mövcuddur və böyük lansmanın bazar günü, yəni "Super Bowl" reklamı ilə birlikdə baş tutacağı gözlənilir.

Bir çoxları bu qədər yüksək məbləğin yalnız bir internet ünvanı üçün verilməsini dəli işi sayır, lakin Marszalek belə düşünmür. O, AI.com kimi bir adın istifadəçilər arasında sürətlə etibar və marka tanınması yaradacağına inanır.

Paşa Məmmədli