"Meta" yeniyetmələrə zərər verdiyinə görə məsuliyyətə cəlb edildi

"Meta" ABŞ-da yeniyetmələrin təhlükəsizliyinə zərər vurduğu iddiaları ilə bağlı iki məhkəmə işini uduzub.

Valyuta.az xəbər verir ki, əvvəlcə New Mexico ştatında keçirilən məhkəmə prosesində şirkət uşaqların təhlükəsizliyini riskə atdığına görə məsuliyyətli hesab olunub. Məhkəmə "Meta"nın “ədalətsiz biznes praktikaları”na yol verdiyini müəyyən edərək şirkəti ümumilikdə 375 milyon dollar cərimələyib.

Bundan bir gün sonra isə Los Angeles şəhərində keçirilən digər məhkəmədə "Meta"nın tətbiqlərini uşaqlar və yeniyetmələr üçün asılılıq yaradan formada dizayn etdiyi qənaətinə gəlinib. Qərara əsasən, şirkət iddiaçıya dəyən zərərin 70%-nə görə məsuliyyət daşıyır. Bu iş üzrə "Meta" və digər platformalara ümumilikdə 6 milyon dollar cərimə tətbiq olunub. "YouTube" isə məsuliyyətin 30%-ni daşıyır.

Ekspertlərin fikrincə, bu qərarlar "Meta"ya qarşı onlarla yeni iddianın qaldırılmasına yol aça bilər. Bildirilir ki, artıq ABŞ-da 40 ştatın baş prokurorları şirkətə qarşı oxşar iddialarla çıxış edib.

Bu dəfə məhkəmələrdə diqqət platformalarda yayılan kontentə deyil, tətbiqlərin öz dizayn xüsusiyyətlərinə yönəlib. Xüsusilə “sonsuz skrol” və davamlı bildirişlər kimi funksiyaların istifadəçilərdə asılılıq yaratdığı vurğulanıb.

Məhkəmə prosesləri zamanı açıqlanan daxili sənədlər "Meta"nın platformalarının yeniyetmələrə mənfi təsirlərini bildiyi halda kifayət qədər tədbir görmədiyini göstərir. Sənədlərdə şirkətin yeniyetmələrin tətbiqlərdə daha çox vaxt keçirməsini artırmağa çalışdığı da qeyd olunub.

"Meta" isə ittihamlarla razılaşmadığını və qərarlardan apellyasiya şikayəti verəcəyini açıqlayıb. Şirkət nümayəndələri bildiriblər ki, yeniyetmələrin psixoloji vəziyyətini yalnız sosial media ilə əlaqələndirmək düzgün yanaşma deyil və bu sahədə daha geniş amillər nəzərə alınmalıdır.

Sərvanə Rəmixanova