"Koi" startapı üçün 400 milyon dollarlıq təklif

Kibertəhlükəsizlik sahəsində ixtisaslaşmış ABŞ-ın "Palo Alto Networks" şirkəti, proqram təminatı ekosistemlərinə tam şəffaflıq təmin edən "Koi" adlı startapı təxminən 400 milyon dollara almaq üçün danışıqlar aparır.

Valyuta.az xəbər verir ki, məlumat rəsmi təsdiqlənməsə də, iddia olunan satınalma şirkətin məhsul portfelini genişləndirmək strategiyası çərçivəsində qiymətləndirilir.

2024-cü ildə Amit Assaraf, İdan Dardikman və İtay Kruk tərəfindən təsis edilən "Koi", korporativ uç nöqtələrdə fəaliyyət göstərən proqram təminatı komponentlərinə - o cümlədən əlavələr, kitabxanalar və proqramçı alətlərinə - tam şəffaflıq təqdim etməyi hədəfləyir. Şirkətin təqdim etdiyi əsas həllərdən biri olan "Supply Chain Gateway", müəssisələrə daxil olan proqram təminatları üzərində mərkəzləşdirilmiş nəzarət imkanı yaradır. Eyni zamanda, süni intellekt dəstəkləyən "Wings" adlı risk mühərriki real vaxt rejimində tanınmamış təhdidləri aşkar edə bilir.

Hazırda 500 mindən çox uç nöqtəni qoruyan "Koi"nin müştəri bazasına "OpenAI", "Jump Trading" və "Fireblocks" kimi şirkətlər daxildir. Startap bu günə qədər ümumilikdə 48 milyon dollar sərmayə cəlb edib.

Xatırladaq ki, "Palo Alto Networks" 2025-ci il ərzində "Protect AI", "CyberArk" və "Chronosphere" kimi bir neçə yüksək profilli şirkəti alaraq məhsul çeşidini genişləndirmişdi. Bununla belə, "Koi" ilə bağlı danışıqlar barədə tərəflərdən hələlik rəsmi açıqlama verilməyib.

Mayya Hüseynova