İlon Maskın sərvəti ilə nələr almaq olardı?

Dünyanın ən varlı insanı olan İlon Mask artıq sərvəti ilə yalnız milyarderlərlə deyil, bütöv ölkələr, sənaye sahələri və qlobal institutlarla müqayisə olunur.

Valyuta.az xəbər verir ki, “Forbes”in real vaxt siyahısına əsasən, İlon Maskın sərvəti 722 milyard dollara çatıb. Bu göstərici onu açıq fərqlə dünyanın ən varlı şəxsinə çevirib. Maskın sərvəti ikinci yerdə qərarlaşan “Alphabet” şirkətinin həmtəsisçisi Larry Page-in sərvətindən iki dəfədən çoxdur.

Belə məbləğlərdə artıq yaxta, şəxsi ada və ya idman klubu almaq real miqyası izah etmir. Ona görə də sual daha geniş qoyulur: əgər bu sərvət kağız üzərində deyil, real alıcılıq gücünə çevrilsəydi, dünyanın ən varlı insanı nəyi ala bilərdi?

Qeyd edək ki, Maskın sərvəti tam likvid deyil - əsasən "Tesla" və "SpaceX"dəki paylarından ibarətdir və fond bazarındakı dəyişikliklərdən asılıdır. Buna baxmayaraq, nəzəri hesablamalar onun iqtisadi gücünün miqyasını aydın göstərir.

1. ABŞ-ın bütöv regionlarını

Hazırkı hesablamalara görə, İlon Mask Kaliforniyanın San Diego qraflığındakı bütün yaşayış evlərini ala bilərdi. Daha irəli getsək, orta qiymətlərə əsasən, Havay ştatındakı 572 minə yaxın ev təsərrüfatının hamısını və ya Merilend ştatındakı bütün yaşayış mülklərini satın almaq mümkündür.

2. ABŞ-da bir il ərzində satılan bütün yeni avtomobilləri

2025-ci ildə ABŞ-da milyonlarla yeni avtomobil satılıb. Bu avtomobillərin ümumi dəyəri belə İlon Maskın sərvətindən azdır. Yəni nəzəri olaraq bir nəfər ölkədə satılan bütün yeni avtomobilləri ala bilər.

3. Elit ali təhsili - dəfələrlə

Bütün "Ivy League" universitetlərinin (Harvard, Yale, Princeton, Columbia və digərləri) ümumi fondları təxminən 200 milyard dollar təşkil edir. İlon Mask bu təhsil sistemini üç dəfə ala, üstəlik yenə də milyardlarla dolları artıq saxlaya bilərdi.

4. İsveçrəni - kağız üzərində

Bir ölkəni almaq mümkün olmasa da, müqayisə diqqətçəkəndir. İsveçrənin illik ÜDM-i 900 milyard dollara yaxındır. Maskın sərvəti dünyanın ən sabit və zəngin iqtisadiyyatlarından birinin illik istehsal gücünə çox yaxınlaşır.

5. “Böyük Neft” sektorunu

"ExxonMobil", "Chevron" və "ConocoPhillips" - ABŞ-ın üç ən böyük neft şirkətinin ümumi bazar dəyəri Maskın nəzəri alıcılıq gücünə sığır. Maraqlıdır ki, elektromobil inqilabının simvolu sayılan bir şəxs kağız üzərində neft sənayesinin əsas oyunçularını da ala bilərdi.

6. ABŞ-ın bütün əsas idman liqalarını

Hazırkı dəyərlərə əsasən:

NFL – 181,9 mlrd $
NBA – 135,5 mlrd $
MLB – 73,6 mlrd $
NHL – 42,4 mlrd $
Cəmi: 433,5 milyard dollar

Bu o deməkdir ki, Eİon Mask ABŞ-ın bütün əsas idman liqalarındakı bütün komandaları ala, üstəlik təxminən 280 milyard dollar da artıq vəsaitə sahib qala bilərdi.

Sərvanə Rəmixanova