Ən yaxşı görüntü və performans təklif edən televizorlar açıqlanıb

Yeni televizor almaq istəyənlər üçün seçim etmək getdikcə çətinləşir. Bazarda müxtəlif texnologiyalar, ekran növləri və qiymət kateqoriyalarında onlarla model təklif olunur. "Business Insider" nəşri 2026-cı ildə almağa dəyər olan ən yaxşı televizorların siyahısını dərc edib.

Valyuta.az xəbər verir ki, reytinq hazırlanarkən görüntü keyfiyyəti, parlaqlıq, oyun imkanları, ağıllı funksiyalar və qiymət-performans nisbəti nəzərə alınıb.

Ən yaxşı televizor: "Samsung S90F"

Ekspertlər "Samsung S90F" modelini ümumi göstəricilər üzrə ən yaxşı televizor seçiblər. OLED ekranla təchiz olunan model yüksək kontrast, canlı rənglər və dərin qara tonlar təqdim edir. Televizorun 144 Hz yenilənmə tezliyi oyun həvəskarları üçün də üstünlük sayılır. 

Ən yaxşı görüntü keyfiyyəti: "LG G5"

"LG G5" yüksək parlaqlıq və görüntü keyfiyyəti ilə seçilərək bu kateqoriyada lider olub. Televizor 2400 nitə çatan parlaqlıq səviyyəsi sayəsində HDR formatlı filmlərdə daha təsirli görüntü yaradır. Bundan əlavə, geniş baxış bucaqları və yüksək kontrast göstəriciləri modeli premium seqmentin ən güclü nümayəndələrindən birinə çevirir.

Ən yaxşı büdcə modeli: "TCL QM6K"

"TCL QM6K" münasib qiymətə görə siyahının ən sərfəli modellərindən biri hesab edilir. Mini LED arxa işıqlandırması və kvant nöqtələri texnologiyası sayəsində televizor öz qiymət kateqoriyası üçün yaxşı görüntü keyfiyyəti təqdim edir. Model həmçinin 144 Hz yenilənmə tezliyinə malikdir ki, bu da onu oyunçular üçün cəlbedici edir.

Ən yaxşı orta seqment modeli: "TCL QM7K"

Orta qiymət kateqoriyasında "TCL QM7K" modeli seçilib. Televizor yüksək parlaqlıq, keyfiyyətli rəng ötürməsi və iri ekran seçimləri ilə diqqət çəkir. Ekspertlərin sözlərinə görə, model daha bahalı televizorlarla rəqabət apara biləcək səviyyədə görüntü təqdim edir və xüsusilə böyük ekran axtaran istifadəçilər üçün əlverişli seçimdir.

Nəşr qeyd edir ki, yeni 2026 modellərinin satışa çıxmasına baxmayaraq, 2025-ci il televizorları hələ də yaxşı seçim olaraq qalır. Onlar daha münasib qiymətə təklif olunur və əksər hallarda yeni modellərlə oxşar xüsusiyyətlərə malikdir.

Sərvanə Rəmixanova