Ceyms Kemeron artıq milyarderdir

 “Titanik” və “Avatar” kimi kassası partlayan filmlərə imza atan məşhur rejissor Ceyms Kemeronun şəxsi sərvəti 1,1 milyard ABŞ dollarına çatıb. 

Valyuta.az Forbes-ə istinadən xəbər verir ki, bu göstərici onu Hollivudun milyarder rejissorları sırasında Corc Lukas, Stiven Spilberq və Piter Ceksonla bir sıraya yerləşdirir. Qeyd olunmalıdır ki, Kemeron bu sərvəti əsasən yalnız film gəlirlərindən qazanıb, digər milyarder rejissorlardan fərqli olaraq kənar kommersiya müqavilələri ilə deyil.

Kemeronun filmləri indiyədək qlobal kassada təxminən 9 milyard dollar gəlir gətirib. Yalnız “Avatar” filmindən onun payına 350 milyon dollardan çox gəlir düşüb. O, həmçinin “The Way of Water” filmi ilə 250 milyon dollara yaxın qazanc əldə edib. Rejissor filmlərinin texnologiya və keyfiyyət baxımından daha da irəli getməsi üçün şəxsi gəlirlərindən belə imtina etməsi ilə tanınır.

Hazırda nümayişi gözlənilən “Avatar: Fire and Ash” filminin də 2 milyard dollardan çox gəlir əldə edəcəyi proqnozlaşdırılır. Uğur olacağı təqdirdə Kemeronun növbəti – dördüncü və beşinci “Avatar” filmlərinə start verəcəyi gözlənilir.

Tənzilə Ağabalayeva