BMW-nin yeni CEO-su kimdir?

Bildiyimiz kimi ötən günlərdə BMW Group-un İdarə Heyətinin yeni sədri (CEO) bəlli oldu. Şirkətin Müşahidə Şurasının qərarına əsasən, hazırda istehsala cavabdeh olan İdarə Heyətinin üzvü Milan Nedeljkovic 2026-cı il mayın 14-dən etibarən BMW Group-un yeni Baş icraçı direktoru və İdarə Heyətinin sədri olacaq.

Valyuta.az xəbər verir ki, o, bu vəzifədə Oliver Zipseni əvəz edəcək.

Qeyd edək ki, Milan Nedeljkovic ilə imzalanan CEO müqaviləsi 2031-ci ilə qədər qüvvədə olacaq. Bu da BMW-nin ona uzunmüddətli strateji etimad göstərdiyini deməyə əsas verir.

BMW-də 30 ildən çox karyera yolu

Hazırda 56 yaşı olan Milan Nedeljkovic BMW-də 30 ildən artıq təcrübəyə malikdir. O, 1993-cü ildə şirkətə Münhen zavodunda təcrübəçi (trainee) kimi qoşulub və illər ərzində texniki və idarəetmə pillələri ilə yüksələrək ən yüksək rəhbərliyə qədər irəliləyib.

Təhsili və ilk illər

Milan Nedeljkovic 1988-1993-cü illərdə Almaniyanın nüfuzlu RWTH Aachen Universitetində maşınqayırma mühəndisliyi üzrə təhsil alıb. Daha sonra ABŞ-də "Massachusetts Institute of Technology" (MIT)-də akademik fəaliyyət göstərib.

2004-cü ilə qədər isə Münhen Texniki Universitetində (TUM) doktorantura təhsilini tamamlayaraq metal formalaşdırma və tökmə texnologiyaları üzrə elmlər doktoru elmi dərəcəsi alıb.

BMW-də əsas vəzifə mərhələləri

Milan Nedeljkovicin BMW-də karyerası əsasən istehsal və keyfiyyət sahələrini əhatə edib:

1994-1999 - Pres və kuzov sexlərində planlama və istehsal prosesləri

1999-2006 - Münhen və Regensburg zavodlarında rəhbər vəzifələr

20060-2010 - MINI Oxford zavodunda boyama sexinin rəhbəri

2010-2013 - Leypsiq BMW zavodunda yığım rəhbəri və zavod direktoru

2015-2018 - BMW-nin əsas istehsal mərkəzlərindən biri olan Münhen zavodunun direktoru

2018-2019 - Qlobal korporativ keyfiyyət üzrə rəhbər

2019-cu ildən - BMW Group İdarə Heyətinin üzvü, istehsala cavabdeh direktor

“Neue Klasse” və elektromobillərə keçid strategiyası

2019-cu ildən istehsala rəhbərlik edən Nedeljkovic BMW-nin elektromobillərə keçid prosesinin əsas fiqurlarından biri hesab olunur. Onun rəhbərliyi dövründə şirkət:

Dünyanın 15 ölkəsində yerləşən 31 istehsal müəssisəsini əhatə edən qlobal istehsal şəbəkəsini yenidən strukturlaşdırıb

Daxili yanma mühərriklərinin istehsalını seçilmiş zavodlarda cəmləşdirib

Digər zavodları isə tam elektrikli “Neue Klasse” platformasına uyğunlaşdırıb

BMW-nin yaxın illərdə təqdim edəcəyi Neue Klasse modelləri məhz bu strategiyanın mərkəzində dayanır.

Niyə məhz Nedeljkovic?

Analitiklər bildirirlər ki, BMW-nin kənardan “vizioner” CEO gətirmək əvəzinə, daxildən istehsal yönümlü rəhbəri seçməsi təsadüfi deyil.

Şirkət hazırda əsas diqqəti:

elektromobil istehsalının sürətlə artırılmasına,

keyfiyyət və xərclərə nəzarətə,

Çin istehsalçıları ilə rəqabətə,

qlobal iqtisadi qeyri-müəyyənliklərin idarə olunmasına yönəldib.

BMW Müşahidə Şurasının açıqlamasında qeyd olunub ki, Milan Nedeljković “strateji baxışı, güclü icra bacarığı və komandaları motivasiya etmək qabiliyyəti” ilə seçilir.

Texniki liderlik və idarəetmə balansı

Şirkətin Debretsen (Macarıstan) şəhərində açılan yeni iFACTORY zavodunun təqdimatı zamanı Milan Nedeljkovicin texniki bilikləri və aydın idarəetmə üslubu xüsusilə diqqət çəkib. Müşahidəçilərə görə, BMW-nin transformasiya dövründə bu cür balanslı liderlik həlledici rol oynaya bilər.

Sərvanə Rəmixanova